吳君如中伏 除浴袍趕客
吳君如與「吹水吹唔停」的薛凱琪和杜汶澤合作拍賀歲片，二人去到邊傾到邊，君如笑言有次「唔覺意」邀請他們到酒店房，豈料兩人傾極都唔願走，君如無計可施，惟有照除浴袍，在房間接受按摩師按摩，兩人竟走埋入房，堅持要一齊傾，十分無奈。
吳君如、鄭中基、薛凱琪等合作拍攝谷德昭執導的賀歲片《百星酒店》，眾人戲內戲外均大放笑彈。吳君如大爆杜汶澤和薛凱琪一個「願炳」一個「願捱」，二人在片場雞啄唔斷非常之嘈，君如說：「套戲喺千島湖拍，有晚我好唔覺意，請咗佢兩個去我酒店房傾偈，點知兩個傾極唔願走！我召咗按摩師上房都等咗半個鐘，我沖埋涼、換埋浴袍，佢哋都唔醒目要走。跟住我叫佢哋擰歪臉，我除埋浴袍爬埋上床按摩，佢兩個仲走埋入我房，話要一齊傾喎！下次都唔敢再叫佢哋嚟。」
毛舜筠日屙幾次
君如指拍攝時經常要中港兩邊走，肩負運帶物資「營救」他們，她說：「毛舜筠每朝要飲十幾款生果混成果汁，我買咗成箱畀佢，佢就同我定時報告每朝屙咗幾多篤。」她又笑薛凱琪大食，每朝都要食一個白切雞連飯。
薛凱琪不甘示弱，又爆杜汶澤在酒店「偷雞蛋」，她說：「酒店每朝有自助早餐，有朝我發覺點解冇晒啲雞蛋，原來杜汶澤要練大隻，要蛋白質，將啲蛋放晒入自己個袋。」她笑指當地苦悶，有空就與君如相約到房間跳「鄭多燕」消磨時間。至於她在戲中，與鄭中基有青蜓點水親熱戲，但拍攝前不熟要混熟，可惜不被領情。問到谷德昭對同期賀歲片有何睇法？他說：「新年流流唔通睇Die Hard咩，大吉利是。」
文：影視組
場地：朗廷酒店