陳蕾忠心護主望留低
亞視怒炒藝訓班「逃學威龍」令全台人心惶惶，因踩單車趕返學而暈低的陳蕾，坦言亞視高層葉家寶曾致電慰問，大讚公司有人情味。小花則指被媽咪一早摷醒，緊張她遲到被炒；而月薪不過萬的Lisa無奈稱，飛的返學每程要捱百多元的士錢，三人甚坎坷。
「星光家族」成員陳蕾（豹哥）、譚杏藍（小花）及李麗珊（Lisa），對於有指上亞視「藝訓班」遲到三次被處分，甚至會慘遭炒魷，三人即表示勁驚，指「打卡制度」令她們好緊張，豹哥謂：「打卡真係一分一秒計住！一開始以為導師入嚟之前到唔算遲，最後先知係計打卡，依家都唔知遲一、兩分鐘算唔算。」小花補充：「到依家公司都冇話過我哋，完全冇處罰，所以應該唔係咁嚴重。」
Lisa直言月薪不到五位數，家住青衣的她更要捱百多元單程的士錢：「好彩家人借車畀我，但油費都好貴，同搭的士差唔多。」豹哥認為返學不計騷錢，還要付額外費用，如車費及午餐，加上又要給家用，令她十分頭痛。
家人擔心被炒
問到家人有否叫她們轉工？三女直言家人很擔心她們被炒，豹哥更不敢告知住廣州的家人，小花則說：「媽咪緊張過我，佢會以為我要返學一早摷醒我，大叫『起身呀！唔返學就會畀人炒喇！』。」Lisa則稱家人因她當藝人而感驕傲：「媽咪有問我『你有冇上堂呀？公司係咪真係炒人？會唔會炒你呀？』，佢哋以前都唔會睇呢個台，但自從我入咗去之後，就叫埋親朋戚友睇。」
早前踩單車趕返學而暈低的豹哥，坦言亞視高層葉家寶曾致電慰問：「家寶有打過畀我問我好啲未、又問對個堂點睇，呢間公司有值得我哋留低嘅原因，聽講外面每個部門都好似好多競爭，但呢間公司好有人情味。」
文：影視組
場地：California Pizza Kitchen @Mikiki