周秀娜決絕：幫佢唔到

周秀娜日前於《第三十五屆十大中文金曲頒獎禮》中高調宣布與拍拖六年的陳偉成分手，其後有傳Avis因「劈腿」搭上o靚模羅彩玲（Vivian）二人更驚爆床照。據悉，「周身屎」的Avis非常驚青，擔心再有第二波親密照流出，故連日來都「潛水」不敢露面。而前晚娜姐則與助手觀看羅志祥演唱會尾場散心，一身黑衣打扮的她大方企定定讓記者任影。

分手後冇再聯絡

昨日下午，娜姐接受本報訪問，聞Avis的緋聞則冷笑說︰「我都幫佢唔到，係嘅話都會祝福佢。」至於Avis可有私下箍煲？她冷淡地說︰「冇！佢冇搵過我，同佢分手後冇聯絡。（考慮復合？）佢再搵我先算啦！」她又懶理對方的感情狀況，問她二人分手原因是否發現Avis有第三者？娜姐說︰「冇話發唔發現，分開係兩個人之間嘅事，又或者可能係分開之後，佢好快有新嘅女朋友呢，我交代得好清楚，我哋分開咗，所以之前同之後發生嘅嘢，對我嚟講，就唔需要去知，大家可以問番佢。」

早前Avis曾與電影拍檔傳出緋聞。

娜姐離開時向記者雙手合十，然後登車。

練功夫盡情發洩

其後娜姐再到灣仔工作至傍晚才離開，甫見現場守候的記者即笑笑口兼雙手合十，並說︰「我趕住去做嘢喇。」即登車離開，直駛九龍灣練功夫，實行把情傷發洩在拳腳身上。另外，她接受有線訪問時，直言對Avis的感情狀況不感興趣︰「大家各有各生活，呢一刻冇聯絡，佢係點樣，我真係唔清楚。」

文︰專案組