Bobby腋暖荷姐碎不和

藝人歐陽震華（Bobby）、關詠荷、苟芸慧等昨日在九龍寨城公園為劇集《情逆三世緣》取景，對於有報道指荷姐因不滿Bobby經常NG，阻礙她收工回家湊女而鬧不和，Bobby甫見記者便主動澄清此事，他勞氣地說：「我知，寫我同荷姐不和嘛！都黐線，不知所謂，話我哋冇交流，係因為嗰日我根本都冇對白。（你成日NG，阻住荷姐收工湊女？）唔係，佢個女咁大個咁精靈，邊使人湊，而且仲有個阿姨睇住佢。」

證情同手足

而有指荷姐曾怒罵Bobby頭髮雖少，但set頭時間比自己還耐，Bobby即反問：「咩少頭髮？我古裝頭喎！呢啲咪黐線，無中生有囉。」對於有指荷姐耍大牌，不肯在公司用膳兼和劇組無交流，Bobby立即撐老友：「佢唔需要耍大牌，佢根本就係大牌，我都係大牌呀，呢啲稱號都係人哋畀，唔會用嚟蝦蝦霸霸，盡量都想工作和諧，劇組有日放食飯，荷姐拉大隊去西貢食，食咗佢成萬蚊，佢點會耍大牌。（荷姐一集5萬？）咁平？5萬點請得起佢，起碼50萬一集。（同荷姐關係？）我同佢情同手足。」

荷姐獲Bobby力撐，難怪她笑得開懷。	苟姑娘認為Bobby與荷姐一起拍劇能擦出火花。	楊秀惠（左）在《情逆三世緣》扮大肚婆。

苟姑娘力撐

而苟姑娘亦力撐荷姐和Bobby沒有不和：「荷姐可以一字不差背晒成篇稿，但係Bobby就比較自由同憑感覺，雖然佢兩個方式唔同，但出嚟嘅火花好好。」而現場所見，未埋位拍攝時Bobby和荷姐一起對稿時有講有笑，不用對稿時，Bobby亦捉住荷姐的手放在自己腋下，為對方取暖。

文：影視組