小豬開騷還拖 秋生：呢條茂利

「亞洲舞王」羅志祥（小豬）一連四場「羅志祥《舞極限》世界巡迴演唱會——香港」前晚在紅館開鑼，台下捧場的小豬媽媽大受豬迷歡迎，小豬大放「銀彈」，以閃爆西裝look出場，與24位舞蹈員跳足半粒鐘勁舞。不過他第一句開場白竟是：「你哋知唔知道我個名？」全場豬迷即尖叫「羅志祥」，小豬就回一句：「大家知道就好！」然後在整整三小時的個唱中，他不下十次問豬迷「我叫甚麼名字」，明寸早前不知羅志祥是誰的黃秋生！

「以為講財經啲人」

曾多次表示「唔識羅志祥」的秋生昨日得知小豬言論後，於電話中寸爆回應：「羅志祥？（即係小豬。）哦！羅志祥，個名仲以為係講財經嗰啲人。（點睇佢台上不斷問觀眾『知道我是誰嗎』？）佢做乜關我鬼事咩！不過你問到，我就突然諗起舞台劇一段對白——喺一個寂靜星光燦爛嘅晚上，你懷疑自己嘅存在，然之後你問自己『我係邊個』、『邊個係呢條茂利』！（你送呢段對白畀佢？）我只係你問起，我突然諗起呢段對白啫！」

秋生昨日接受電話訪問時，仍不記得羅志祥是誰。（資料圖片）	小豬與舞蹈員大跳辣身舞，疑似被摸下陰的他禮尚往來，右手在女方胸前徘徊。	放大圖片

未知自己被秋生由「路人甲」升呢至「茂利」的小豬，全晚表現High爆，除了一王四后在台上跳辣身舞兼互摸外，更不時跑到台邊拎起豬迷的手機自拍，又將充滿「體香」的毛巾拋落台，一名瘋狂豬迷更乘機錫偶像面珠一啖，恨死台下一班癡女！他又扮和歌迷在KTV唱K，作狀點歌的他講到「3169」的「9」時卻不慎爆粗，歌迷即時大叫「說髒話」，小豬無奈地說：「我有嗎？哪裏？我唔知道對唔住啊，所以我唔敢講廣東話囉！」

有豬迷趁混亂向偶像獻吻。	甚懂冧粉絲的小豬，拿起歌迷的手機玩自拍。	小豬母親在台下風騷任影。

要粉絲承諾捧場

及後駁上粉紅馬尾的他更「一代宗師」上身耍功夫，大玩螳螂拳和醉拳，又搞笑地在神曲《忐忑》的音樂背景下與舞蹈員高手過「蕉」，用口接「蕉」後的他更即場剝蕉皮扔給台下觀眾，並笑言：「多吃香蕉對骨頭好。」小豬又「強迫」歌迷承諾要繼續捧場：「如果我下次辦60歲演唱會，你們沒有來，就找不到老公老婆、找不到工作、沒辦法大便小便！」不過最後當「舞王」跳《舞法舞天》時竟笑到甩嘴兼甩舞，事緣小豬以為自己戴住黑超，當他想Chok甫士托黑超時卻發現「托空氣」，老貓燒鬚的他雙手掩面，更笑到要叫停音樂從頭再來，瘀到爆！

文：音樂組