祖藍懶理中港矛盾《老表》開續集
由王祖藍及郭晉安主演的新劇論盡中港兩地關係，播出幾天已被網友狂轟醜化港人及加深兩地矛盾，有份度橋的祖藍大感不忿，不過「你有你鬧，收視爆棚」，無綫眼見新劇廣為人討論，大唱反調打算開拍續集，懶理捱插！
王祖藍編劇加主演，與郭晉安及萬綺雯合演的新劇《老表，你好嘢！》，以誇張喜劇方式描述中港關係，影射早前在港發生的「名店不准拍照」及「導遊阿珍」等事件。安仔演的香港導遊普通話發音差到離譜，祖藍的東莞人則滿口鄉音，播映數天引來廣泛討論，有人讚笑到碌地，但同時有大批網友不滿力數多宗罪，怒斥劇集加深兩地矛盾，抹黑港人及影響香港旅遊業等，通訊事務管理局累積投訴達70宗！無綫昨再收2宗投訴，但另有9宗讚好，要求不要腰斬！
否認詆毀 全屬事實
面對千夫所指，祖藍昨日在微博留言，似覺創作自由被扼殺：「當大家埋怨香港電視劇沒新意、沒膽量寫實時，殺死電視劇的就是這些人！」監製黃偉聲稱前日收到一名觀眾來電，狂鬧他十幾分鐘：「佢話香港人唔係咁，不過咁多人鬧，證明有人睇啦！唔會因為咁刪減或者腰斬。」製作部總監（戲劇）梁家樹（Tommy）則對劇集非常滿意，更打算開續集：「我哋會接受意見，不過前一晚收視繼續有30點，好滿意。如果持續咁好反應，會開續集添！啲人話詆毀，根本都係事實，只係喜劇放大少少。（黃偉聲畀人鬧咗十幾分鐘！）畀我報咗警啦！」
對於無綫想開續集，有份度橋的祖藍直言感動，大讚Tommy有義氣：「向來TVB好怕投訴，今次都咁撐，對我哋真係信任！（續集有咩新橋？）暫時未諗到，其實我擔心係首播虛火，套劇20集，起碼去到中段先，叫Tommy睇定先啦！」昨日祖藍的電台訪問播出，他笑言劇本是在沖涼時想出。問會否怕得罪人？他說：「冇作嘢，好似港人照鏡咁，只係誇張咗。」
朱咪咪嘆港人太躁
女主角萬綺雯亦望網友息火，認為內地人或香港人都是中國人，希望觀眾多多包涵：「喜劇係誇張啲，之後會有其他元素，畀啲時間啦！（開續集？）梗係好事啦！」對於劇中的港人見人民幣笑到見牙唔見眼，有份演出的朱咪咪笑說：「畀我都係啦！係事實，香港人真係躁咗，係又鬧唔係又鬧！」
文：影視組