黎耀祥聽話演員 少改劇本
黎耀祥近年在無綫一劇接一劇拍，說到休息，他笑言雖然很攰，但心裏很矛盾，坦言喜歡一班人一起工作的感覺，更謂：「我都好貪玩。」他又指暫時不會拍電影，若拍的話，希望跟許鞍華及林嶺東合作。
視帝黎耀祥去年一口氣拍了三套劇《大太監》、《造王者》、《神探高倫布》，今年亦接拍兩套劇集，現正忙於拍攝《傳愛事務所》的祥仔與好戲之人陳豪合作，問到兩位視帝碰頭，拍攝時會否一齊研究劇本或改劇本，祥仔坦言：「我同陳豪好多年前合作過，今次再重逢都好開心，有另一份新鮮感，都會傾吓溝通吓，不過我向來好聽話，改劇本真係比較少，我會嘗試從人哋角度去諗而演繹，如果自己改劇本，咪一路都係做緊黎耀祥？我都想有啲轉變，出嚟嘅效果係有唔同，當然偶然修改都會有，但我習慣照編審、導演、監製嘅意思去演。」
去年尾，祥仔曾到馬來西亞拍攝電影，問會否再接拍？他謂：「唔會拍太多，如果真係要拍，我最想同許鞍華、林嶺東合作，之前同佢哋都合作過，（係情意結？）除咗情意結，之前拍《幽靈人間》，我好欣賞許鞍華嘅投入，每拍完一個take佢都會好開心，睇得出佢對電影係好有熱誠，如果許鞍華再搵我，平啲我都會拍。」此外，他與林嶺東合作過電影《目露兇光》，祥仔謂：「佢都做過演員，會帶你入到場景，畀你感受一下，從佢嘅視覺，我都睇到好多。」
貪玩之人享受開工
祥仔曾表示想放一個長假，跟家人去旅行，不過他有些矛盾，坦言：「我都唔知，有時想停落嚟，但其實我又好享受拍攝過程，我好開心成班人一齊工作嘅感覺，如果唔拍嘢，我做乜呢？休息都唔休息得咁多，我好明監製搵得我，個角色一定好啱我做，一定好好玩，我都好貪玩，所以攰得嚟都幾矛盾。」
文：影視組
髮型：Ivan Lee@Headquarters
場地：Izzue