蔡恩真轉戰香港 組隊求Fun
韓模蔡恩真（EJ)在韓國K-Pop樂壇打滾十年，曾與熱爆紅人Psy同台見面，如今留港加入組合「Girls Kingdom」純粹求fun，但尋樂趣不代表她拒絕認真，EJ大爆韓國歌手辛酸史，認為不少香港年輕歌手尚有進步空間，應該向容祖兒和陳奕迅學習。
在韓國做了十年歌手，EJ回想在K-Pop舞台常常與紅人Psy見面，並大讚他好人：「我喺韓國唱咗十年歌，點會見佢唔到？每次有show所有歌手都會出席，大家都成日見到Psy，佢好nice o架，但合唱就未試過！」EJ坦言如果可以與Psy合唱，絕對是求之不得。
不過如今留港做模特兒，EJ加入組合「Girls Kingdom」但求輕鬆：「喺韓國每日都係工作，好大壓力，但嚟呢個組合就唔同，it's just for fun！我哋幾個女仔都係model，有job就合體唱歌，完全無壓力。」
鼓勵後輩
已是樂壇老手的EJ認為某些年輕香港歌手要多多學習，歌藝才可飛躍進步：「雖然我聽唔明佢哋唱咩，但都識分邊啲歌手嘅歌聲好聽，有啲後生嘅歌手明顯練得唔夠，唱得唔夠好聽，但我聽容祖兒同陳奕迅唱歌，就聽得出佢哋係出色嘅歌手！」
別以為EJ寸嘴，其實她早在十數年前已在韓國打好唱腔底，更透露韓國歌手的辛酸史：「依家韓國嘅歌手出道前至少要被培訓五年，甚至十年，我嗰陣都要練四年先出道，我哋每一日朝早就要練歌、練舞，無人逼我哋，係我哋每一個人都想唱得好，所以K-Pop音樂可以咁紅真係有原因o架！」
文：專案組