鄧健泓不望復合 繼續變態
揚言「再見亦是朋友」的鄧健泓（Patrick）與舊愛龔嘉欣，自去年11月「掟煲」後未再同場，昨兩人有份參演的劇集做宣傳，卻「有你冇我」獨見Patrick一人，他否認兩人刻意迴避，指嘉欣因病缺席，並坦言未必復合。
無綫藝人鄧健泓（Patrick）與拍拖兩年半的龔嘉欣分手後，傳因前港姐張嘉兒做「小三」介入，自此「鄧龔」未有同場出席公開活動。昨日Patrick與郭羨妮、陳錦鴻、黃浩然、林夏薇、楊秀惠等到大埔林村許願廣場，宣傳新劇《初五啟市錄》，同劇的龔嘉欣卻因病甩底。
被嘲「鹹濕仔」
劇中飾演「鹹濕仔」四圍滾的Patrick被魯振順嘲笑：「你做自己啫，對你嚟講唔難。」事後，Patrick自認鹹濕，笑言在劇中超鹹濕，笑他是否鹹濕舊愛龔嘉欣？他即尷尬的說：「唔敢，我哋好少對手戲。（佢唔來係避你？）唔係，佢唔舒服，我噚晚都有同佢聯絡。（畀你激親？）冇，大家都係朋友。其實都過咗去啦，要同場我都唔介意。（有機會復合？）我哋係有問題先分開，呢啲都係好將來嘅事，未必有咁嘅可能。」他又強調跟張嘉兒屬好朋友。提到無綫最近愛拍「強姦戲」，Patrick笑言：「我好喜歡做變態嘢。（想嗒邊個？）朱咪咪，一定好收視！」另方面，龔嘉欣昨於微博稱屙嘔不適。
榮升媽咪的郭羨妮（Sonija）說拍劇不時跟陳錦鴻談仔女經，並透露正為選校而煩惱，會否送囡囡到外國讀書？Sonija說：「大個啲會，我會跟埋去，可能之後會見唔到我。」說到可會到內地賺人仔？她則說：「除非價錢好吸引，又彌補到見個女先會考慮。」
文：影視組