豆斗三囡夠晒數 拜佛不為子
昔日性感女星邱淑貞育有三女生活美滿，但屢傳她拜佛求生仔，昨日她出席大寶法王來港活動，罕有地為傳聞侃侃而談，除了澄清與老公沈嘉偉從未打算強求生仔，也沒有求神賜仔，更直言安於現狀：「係追就一早搞咗！」
已淡出娛樂圈的一代性感女神邱淑貞（豆斗）昨日與甄楚倩、郭富城及連炎輝齊出席第十七世噶瑪巴大寶法王聽列泰耶多傑來港記者會。法王於現場為信眾及傳媒加持祈福，豆斗與眾人均對法王十分尊敬，不時點頭合十。大會宣布法王將舉行多個活動，包括本周五至日舉行法會及灌頂，下周一、二晚舉行佛學講座，下周六進行放生活動，下周日則設謝師晚宴。
冤枉師傅感無奈
身穿鬆身裙加白色西裝褸的豆斗雖年屆44歲，仍保養得宜明艷照人，她透露已信奉佛教逾18年，問其丈夫沈嘉偉及三名女兒是否也跟她信佛？她說：「先生冇宗教信仰，但會支持我，囡囡就好乖，我拜乜佢拜乜。（帶囡囡見法王？）要就返學時間，其實佢哋之前都見過。（想法王祝福你乜嘢？）普通祝福就得。」近年不時有傳豆斗拜佛求生仔，問到會否向法王求子？她即滔滔不絕澄清：「從來冇咁嘅事，點解一定要仔？我同丈夫都冇呢個觀念，咁樣冤枉咗師傅，好似搵佢一定要做呢樣（求子）咁！」她強調現時生活很美滿，三名女兒很乖很嗲：「依家科技咁發達，係追就一早搞咗，我想順其自然，囡相當好呀！到老時都係囡照顧父母。」
有學識才踏星途
提到大囡沈月與她甚似樣，豆斗笑說：「細心睇其實唔似，只係感覺似。（想女兒入娛樂圈？）未諗住，佢仲細，讀好書先，依家最緊要開開心心，想佢接觸多啲佛學，對成長幾好，教到慈悲心、同人和諧相處。」
文：影視組