偉仔頻撲捱病 電眼跌watt
最近為工作頻撲的梁朝偉前晚難得留在香港，但亦要到中環一間酒店傾公事，離開時，見一臉疲態的偉仔戴口罩步往取車，不過他亦識做地為代客泊車員送上貼士，他上車後便除去口罩，露出倦容，其電眼亦跌watt，之後獨自駕車返歸。
剛由內地宣傳新戲返港的梁朝偉，前晚難得在港，但沒有把握時間休息，反而繼續出動到中環一間酒店洽談公事。只見偉仔在8時多入內，足足逗留至深夜11時許，才發現他戴住口罩、穿上黑色羽絨、全黑打扮的偉仔，一臉疲態步出酒店到門外取車，未知是否忙到要頻頻講電話，搞到電話沒有電，見他褸袋裏伸出了一條駁住電話的叉電線，忙到要邊行邊叉電。
上車除口罩
偉仔取出早已預備好的數張「紅衫魚」給予代客泊車員後，登上其四驅座駕的司機位，為免把病菌傳染給他人，上車後才把口罩除低，但見偉仔的一雙電眼跌watt，樣子殘爆！不過，他臨走前亦不忘向職員揮手道別，然後獨自駕車返歸。在新片中好打得的偉仔，最近亦頻頻為電影四出宣傳，可謂忙到甩轆，結果捱出病來，看來嘉玲要多煲湯水慰勞偉仔。
嘉玲拖男伴
另邊廂，約凌晨一時許，嘉玲出席完好友婚宴後，翹住其男性好友Joe步出，見記者拍照，她依然keep住燦爛笑容，然後齊齊乘七人車由司機接載離開。
文、攝：追蹤組