趙式芝違背立場 撐母送抱
趙世曾女兒趙式芝（Gigi）「出櫃」與另一半Sean（楊如芯）辦「同性婚姻」，令父母無法接受，昨日其母姚煒出席反對訂立性傾向歧視條例活動，雖然活動與Gigi的信念背道而馳，為撐母親仍伴母出席，兩母女更在台上貼面相擁。可見Gigi愛得轟烈的同時，也十分重視親情。
昨日Gigi陪伴母親姚煒出席由基教團體舉辦的反對訂立性傾向歧視條例「愛家共融祈禱音樂會」，任嘉賓的姚煒與周永恒分別上台分享。
姚煒表現肉緊
在五分鐘的分享中姚煒情緒激動，說到心痛處更一度哽咽：「2006年知道個女同同性戀者一齊，好嬲，有撞頭埋牆的衝動，2008年我去咗以色列旅行受神感動學識包容，接受對方（Sean），覺得佢好孝順。幾個月前知道個女同對方安排結婚，好心痛，我跪低向個女哭訴，要求佢動作唔好太大，畀空間同準備我。有一日有報道寫「同志結婚阿媽祝福」，睇到我心如刀割，失聲痛哭，感覺生不如死，幾乎崩潰。其實我唔係好清楚個女內心世界，依家知道點樣對個女好。」姚煒說完Gigi便上台跟母親面貼面擁抱。
唔想媽咪匿埋
事後Gigi接受電話訪問說：「今日出席活動同我立場背道而馳，我係支持立法，但我係以支持媽咪嘅身份去，因主辦單位邀請咗我媽咪分享事例，覺得母女感情比政治因素更緊要，去到咪聽吓唔同觀點，我在場唔代表我嘅立場，佢哋邀請媽咪，媽咪又想我去，我尊重佢，想佢企出嚟，因為我公開同Sean關係後，佢有段時間唔見人，想佢行出嚟好過匿埋咁辛苦。（今日係平常心？）唔係，初時好矛盾有衝突，最終覺得母女情最重要。（同媽咪關係好轉？）作為父母聽到同性戀，實有掙扎，上天賜予力量。（佢反對你同Sean嘅婚事？）我唔代表佢答，等佢適當時出嚟講。今日去完更加堅定立法嘅迫切性，唔立法嘅話，喺『衣櫃』嘅人無法釋放壓力，甚至會做出負面行為例如恐嚇反對立法嘅人。去年5月聯合國已經通過同性權益等同人權，香港作為國際都市，都應該立法，唔應該歧視同性戀。」
Sean坦言最初反對Gigi出席是次活動，但明白母女情的重要，不想影響她們的感情，她自己絕對支持立法。
文：名人組