貢米入院縫針起色心
有「翻版張栢芝」之稱的內地女星貢米，趁其演出的內地電影煞科後來港遊玩數天，豈料到港第一天便樂極生悲，不幸遭玻璃割傷腳踝而流血不止，傷口更要縫針，原定計劃到北京見導演亦要延遲數天，但幸好沒影響工作。自小就怕打針的她提起意外時仍猶有餘悸：「啱啱整親嗰陣完全唔覺痛，識痛嘅時候已經成地血，嚇親爺爺嫲嫲！做手術嗰陣雖然有局部麻醉，但係都痛到我大叫，我覺得好瘀呀！」
話雖如此，但性格樂天的貢米卻視這次是「另類旅遊」，她更大讚香港醫護人員細心及靚仔：「喺救護車嗰陣啲救護人員係咁同我傾偈，幫我分散注意力，同埋佢哋好靚仔，制服又好型！」她又透露原本這次來港想到迪士尼樂園，雖然現在沒有機會，但可以一睹香港救護車已經很滿足！
嘆男友難覓
因傷而需別人照顧的貢米，坦言其實希望拍拖：「好多人都以為藝人好易搵到另一半，但其實唔係，就好似拍戲或者拍劇咁，相處只有三個月時間，到你想深入了解嗰個人嘅時候，套戲已經拍完，所以唔係咁容易建立到感情。」安全感一向是女生擇偶的重要條件之一，貢米也不例外，她堅稱不喜歡跟演員談戀愛：「我覺得演員係好唔穩定嘅工作，而且呢個圈又好多誘惑，所以我想搵啲有穩定工作嘅人，可以定時返屋企嘅。」
文：專案組