黎耀祥陳豪被迫滴血入會
兩大視帝黎耀祥及陳豪在新劇大放笑彈，飾演型仔律師的二人慘遭黑社會被迫滴血踢入會，驚驚青青不慎打爛碗，即被眾黑幫圍住及拍照，要求兩人擺Chok樣！
黎耀祥及陳豪兩大視帝在新劇《傳愛事務所》大鬥演技，昨日拍攝二人被迫踢入黑社會的戲份。劇中兩人飾演律師，西裝骨骨示人，有型有款，豈料原來得個殼！見他們驚驚青青，被一名手持刀仔的「黑幫」強迫滴血為盟，未幾更嚇到頭暈兼錯手「打爛飯碗」，隨即引來眾人上前圍住拍照，以「影相」作新潮入會儀式，四名黑幫又叫囂要求二人擺Chok樣，祥仔惟有勉為其難尷尬笑住影，老實陳豪則唔識死直言：「我唔識Chok o架喎。」
自嘲NG王
自劇集《秀才遇着兵》後，二人相隔7年再度合作，面對已升格為「三屆視帝」的祥仔，陳豪稱未有感到壓力，並笑謂：「好開心，我一直都想同祥仔合作，遇到好對手真係好難得，令到我都要做好啲，因為祥仔唔會NG，所以我都唔可以NG太多，但我出名係『NG王』！試過拍《洛神》一個Take拍咗三、四十次！」在旁的祥仔即搞笑道：「你邊係『NG王』呀，要數喺TVB都未輪到你啦！」
靚仔取勝
談到近日多套無綫劇集的內容踩線，例如強姦及性感賣肉場面，問到該劇可有類似爆點？兩人即異口同聲、耍手擰頭：「呢啲留番畀第二個啦，我哋唔拿手o架！」並表示該劇較着重劇本內容，當記者指該劇靠演技取勝時，祥仔便鬼馬地說：「唔係喎，其實係靠我哋兩個靚仔！」對於前無綫監製戚其義離巢，1991年與他合作過《漂白英雄》的祥仔坦言感到可惜，陳豪則希望對方有更好發展。
文：影視組