林峯唔捨得走袋1870萬

林峯自去年底失落被視為囊中物的無綫視帝後，有指他對公司相當失望，雖然尚有兩年合約，但卻去意已決，準備回廈門協助父親打理家族建築生意，無綫聞得愛將有此打算即陣腳大亂，及後便花盡心思諗計，望以實際行動令阿峯回心轉意。

高層出面力撐

正忙於為本月底個唱綵排的阿峯，日前與一班舞蹈員於排舞室排舞，期間無綫高層區偉林、樂易玲聯同英皇高層吳雨專程到來探班，區、吳兩人還即席夾份800元萬歲，問到是否親身到來安撫阿峯，區偉林謂：「唔係，因為開完會，又好想嚟睇吓阿峯啫！公司對每個員工都錫，我覺得阿峯好認真，跳舞非常唔錯，到時都一定會去捧場。」樂小姐則謂：「我哋一齊撐，不過區生錫阿峯先啦！」

區偉林（左起）、吳雨夾錢萬歲，樂易玲和林峯笑騎騎。	林峯為月底個唱努力排舞。	和舞蹈員合作愉快，林峯大合照時再顯Chok王本色。

贏最受歡迎獎

而今晚於電視城舉行的勁歌總選，無綫亦會首度頒發「最受歡迎男歌星」給阿峯，據知近日無綫亦為他力爭內地大製作，以50萬人民幣一集身價接拍至少30集的古裝劇《陸小鳳》，猶記得視帝鄭嘉穎以35萬人民幣一集接拍劇集《葉問》，最近則傳出他以50萬人民幣一集斟洽《葉問2》，不過尚未成事，故阿峯暫成為無綫最高身價的小生，本身是武俠小說迷的他，早已對「陸小鳳」經典人物着迷，亦曾接拍劇集《三國》、電影《楊家將》等，故今趟於可觀的片酬及角色人物大前提下，阿峯當然扑錘接拍，即使古裝要黐鬚及連場打戲，但阿峯也沒有異議，而片商也十分重視，除了會找內地一線女星配襯阿峯，幾大內地電視台亦早已預留年底黃金檔播放，由於該劇待4月份才開工，故完成演唱會後，無綫先開綠燈，破天荒給阿峯放一個月悠長假期充電。

追隨樂易玲

對於無綫如此有心，問到續約事宜是否有彎轉？阿峯昨日接受訪問時謂：「一直以嚟公司好錫我，好多嘢大家有默契，總之，樂小姐去邊就跟去邊（公司幫你用50萬一集拍內地劇？）真係唔知，我只係知道古仔同角色係點，錢嘅嘢交畀經理人安排，咁呢個角色以前松哥（劉松仁）都做過，佢係我好欣賞嘅前輩，又做過我爸爸，所以拍之前都會請教爸爸，希望帶到新鮮感畀大家。」

文：影視組