張天愛蝴蝶蛻變
張天愛是位不折不扣的奇女子，從不被傳統的枷鎖綑綁，亦不介意世俗的眼光，經歷過四段失敗的婚姻，但從沒有後悔，她的字典裏是「合則來，不合則去」，依然勇於追求愛、追求變，為求人生變得更精彩。年過半百，她揚言是人生的開始，過往所吸收的經歷，是時候發揮所長，讓夢想高飛。
張天愛（Flora）與王盛德（Russell，羅素）結束九年的婚姻生活，離過四次婚的Flora每一段均是認真對待：「人去到某個階段會變，見識多咗、朋友圈不同、相隔兩地，感情會變，情感亦會變，當你感到兩人開始行喺兩條不同嘅平行線，大家再冇聚集點，倒不如放開對方，大家各自飛。」
為錢嫁人悲哀
兩人均曾努力欲挽回這段婚姻，分別為對方留在美國及北京，Flora說：「兩個地方都發揮唔到大家長處，佢喺中國日日頭痛，冇人知佢係邊個，冇戲拍，適應唔到，我寧願放佢走，我知大家都愛對方，但唔係個個有夢想，我為夢想而放棄愛情。（自私嘅人？）如果我冇內涵，我唔自愛，唔付出就可以咁講，但我有工作，要明白自己做嘅嘢唔係玩，唔係好食懶飛嘅人，只係不甘於做『太太』。如果個男人想搵個只為愛嘅女人，我一定唔啱佢哋，愛我嘅人要知我係藝術家，我會好瘋狂投入去做，佢哋要鍾意我所做嘅嘢，我好似孔雀咁，要懂得去欣賞、去配合，男人唔應該咁自私要老婆只留喺屋企。」
兩人分開，因感情上出現了差異，Flora覺得「變」才會有進步：「女人都係半邊人，個個都覺女人係弱者，做花瓶，男人係強者，咁諗係錯，依家21世紀，女人係有能力，點解仲要有呢啲傳統嘅觀念，我覺得好冇意義。啲人成日問我點解工作咁辛苦，感情好複雜，我聽到會好奇怪，雖然離過四次婚，但我好專一，不過啲人點睇我，I don't care，反而有啲女人只為搵個有錢人嫁咗佢，我覺得係可悲、可憐。」
獨生一女
四段婚姻裏Flora只有與第二任丈夫邢李源育有小朋友，女兒邢嘉倩雖然跟爹哋生活，但Flora與女兒的關係十分密切，相處如朋友無所不談，她說：「細個時我管佢好嚴厲、要求好高，成日會訓示佢，佢好怕我，但佢亦知我好愛佢，佢老竇教得佢好，阿女係個好有自理能力嘅人，又鍾意讀書，做人處事好有分寸，知自己想做乜，會為自己鋪路，好叻女，從來都唔使我為佢操心。」
有一百樣優點
假若他倆有小朋友是否不會離婚？Flora認為不會影響結果：「一齊唔開心，睇唔到共鳴，唔分開仲可悲，離婚唔係啲咩唔好嘅嘢，我哋仲愛對方，心中沒有恨，咁多段婚姻我未試過恨，大家都係和平分手，仇恨好傷大家，低級又傷人格。婚姻在我人生中，只佔據20%，80%係舞蹈、文化、藝術，傳統係要變，唔再係紮腳年代，對感情唔可以講大話，有啲人表面係夫妻，私底下各有各玩，為面子為聲譽，唔夾都唔離婚，我覺得好悲哀，會好空虛。」現階段她不乏追求者：「佢哋覺得我interesting，聰明、國際化、靚，出得廳堂入得廚房，但我仲有一百樣嘢好，唔止咁表面。」
已嫁咗畀藝術
Flora畢生追求藝術，已找到她的夢想——開藝術學校培訓人才，為尋「夢」放棄婚姻，她說：「有次同一個佛學朋友傾偈，喺佢身上領會好多嘢，令我明白50歲並唔係退休嘅年齡，而係人生的轉捩點，零至50歲係吸收、學習、嘗試、成功、失敗，係畀我哋累積經驗，好似人生的大綵排，之後是變成美麗的大蝴蝶，發揮真正人生力量。」
現時Flora向她的藝術夢想出發，在北京開設藝術培訓學校，以她的經歷去栽培有才華的新血：「比起我做時裝、舞台設計更有意思，嗰啲全部都係死物，衫用咗就冇，就算你不停購物買嘢，係咪真係可以滿足內心世界？買嗰刻係開心，之後都係空虛。但培育一個人係培育佢嘅內心，教小朋友跳舞、音樂、藝術，佢哋學到嘅係屬於佢哋自己嘅，只要勤力、積極，就可以令自己更美麗。我實在太愛我嘅工作，現階段我嫁咗畀藝術。」
現代芭蕾x八卦掌
Flora無論在時裝設計或舞蹈上，都喜歡用中國元素，就算西方的芭蕾舞，亦希望將它變成中西合璧，現在Flora正攻讀一個跳舞的博士學位，並努力寫論文，是關於現代芭蕾舞與八卦掌的結合，當談及此，她十分雀躍，不時手舞足蹈，開心地說：「我要做嘅係中西舞蹈，依家已經不停排緊舞，八卦掌運用喺芭蕾舞上，有好多不同變化，呢套舞蹈亦將會係我以後嘅主旨，中西合璧先係主流，我人生最大嘅目標，係喺舞蹈界為中國人發揮最大力量。」
採訪：Jessica Lam
攝影：吳文聰