周秀娜被圍 粉絲扯手黐頭
【黎寶倫東莞直擊】周秀娜、黎耀祥、吳鎮宇昨日一起出席大陸活動時場面混亂，周秀娜遭扯手之餘又被男子「黐頭」影合照，嚇到「打個突」，而祥仔則被迫與小朋友同台尷尬表演。
周秀娜、黎耀祥、吳鎮宇昨日於東莞為餐廳擔任開幕嘉賓，三個一到埗便被現場半百市民圍堵，寸步難行，坐下時又被不少阿叔、師奶fans圍住。期間周秀娜慘遭女fans扯手，甚為陰功，之後更有男fans忽然走過她身邊「黐頭」影合照，她即時被嚇親兼彈開。吳鎮宇則全程面露無奈之表情。
而黎耀祥在演唱期間，有位上了年紀的女人抱了一名一歲多的小朋友上台，小朋友更行到祥仔身邊，女主持見狀欲上前捉着他「解圍」，可惜失敗，祥仔惟有照唱，場面相當尷尬。
有猛男保護
事後周秀娜坦言被女fans扯手那一刻相當突然，她笑謂︰「好在嗰個女人冇gel甲，冇整親，自己近排都練咗身體，肌肉都頂得住，都唔擔心嘅，身邊猛男喺度。（係咪次次都咁混亂？）唔係，係今次咁勁咋！不過我自己都想拉住鎮宇同祥仔影相。」
凍到起雞皮
問周秀娜為何只露腿出席，她表示自己凍到「起雞皮」。她又坦言除夕將於北京工作。說到其男友，她謂︰「叫佢飛過嚟，（叫咗佢跪玻璃未？）未跪，都冇時間。」而黎耀祥指自己未試過與鎮宇一齊出席活動，說到亞視因藝人缺席上堂而被炒，祥仔表示：「不進則退，學嘢係應該，不過要讀亞視歷史就無謂。」