林峯背吳千語 夜中環「偷食」

林峯在今屆視帝大熱倒灶，即傳他因而向無綫扭計，甚至指他萌生去意，欲退出娛樂圈。前晚林峯出席《勁歌金曲》錄影後，約9時離開電視城，背負沉重壓力的他隨即往中環夜蒲，背緋聞女友吳千語「獵食」減壓。

一度悶到放蚊

單拖到場的林峯，會合數名男性朋友後即步上二樓餐廳，只見他刻意挑背向窗口的位置坐下，向來注重體形的林峯，懶理即將於一月尾舉行演唱會要狂操fit，竟放縱地豪點美食，然後開懷地埋首，享受密密「偷食」的快感。未幾場內不少女性發現林峯蹤影，卻只敢眼望望，最後一名金髮戴cap帽潮女二話不說選坐林峯對面，非常主動！最初兩人交談不多，cap帽女悶到頻頻「放蚊」，至幾杯落肚後，兩人才漸打開話題，更似愈來愈投契，旁若無人地密密斟。林峯此時終拋開煩惱，頻頻出招氹女，金髮潮女明顯相當受落，不停甜笑。

緋聞女友吳千語

飛奔入場 林峯錄影後，急急到餐廳會合友人。

及至晚上12時半，潮女轉跟身旁的男性交頭接耳，表現親暱，甚為無癮的林峯為免顯得尷尬，不時擰轉頭四處張望，突然他眼利地發現記者，為免行蹤曝光激嬲緋聞女友吳千語，他即撇低潮女獨自急急從秘道離開。

蟻摟蜜糖 林峯背對街口而坐，吸引場內的金髮潮女坐低mark實。	開場悶爆 二人起初交流甚少，潮女竟一度擘大口「放蚊」。	中場喪傾 林峯隨後與潮女打破隔膜喪傾，即使擰轉頭也見他笑得燦爛。

合約有排未完

早前《好報》率先報道林峯失落視帝後扭計唔拍劇，昨日再有報道指他有意退出娛樂圈，幫其富豪父親打理生意。記者昨日致電林峯，面對外間種種流言，他說：「老竇叫我幫佢做生意唔係今時今日嘅事，由我入娛樂圈已經講唔好做，細佬今年畢業，可以由佢助陣先，全力幫老竇手，（有傳你攞唔到獎意興闌珊？）我同無綫仲有一段時間合約，所以唔會退出，況且攞唔攞到視帝同續唔續約係兩回事。」

文、攝：追蹤組