香香狂擦大餐 怨男士無禮
「宅男女神」岑麗香出席以甜品為題的活動，加上其笑容可謂甜上加甜。她透露剛返加拿大與家人團聚，狂擦大餐過了一個溫暖又飽肚的聖誕，但竟然沒有男士趁機送禮追求，認真嘥料！
岑麗香昨日到馬鞍山出席活動，身穿紅色連身裙的她大賣甜美笑容，引得龍友及街坊狂影。現場她為小朋友廚師的甜品評分，又幫蛋糕裝飾。香香表示剛從加拿大返港，與家人及朋友過聖誕，令她大感溫暖，最開心是與八十四歲婆婆食大餐：「十年前我送咗頂帽畀婆婆，見佢次次影相都有戴，今次送頂新帽畀佢。我又食咗三餐聖誕大餐，肥咗啲，唔敢上磅呀！要做吓運動先。」
父母開通 唔怕緋聞
問有否收男士送的聖誕禮物？她說：「冇喎！冇人有表示，可能佢哋怕醜。（家人催拍拖？）以前都有，但今次冇，主要戥我多咗嘢做開心。我又唔急拍拖，驚會分心，希望事業去到咁上下先搵男友。（身邊冇合適人選？）可能有，但我冇留意。」
問到曾傳緋聞的陳國峰可有送禮？香香表示沒有，與對方只是Hi Bye朋友。對於好友苟芸慧因惹緋聞被屋企人訓話，香香表示父母思想開通：「佢哋都對我有信心嘅，如果我真係拍拖會話佢哋知，真係冇所謂。」
處女樂團 慢慢商量
提到苟芸慧早前表示想與香香、鍾嘉欣及李亞男等組合唱團，香香大表贊成，覺得創意十足。對於有提議她們組合名為「處女樂團」，香香說：「個名要再商量下，傾下唱咩歌先，我都要開始練下中文歌。」
文：影視組