何超蓮遇爆粗莽漢 險捱摑

賭王與三太陳婉珍的千金何超蓮，向來並非夜場常客，昨日凌晨1時許，在節日氣氛帶動下，她身穿超短貼身裙外襯皮褸，大騷索腿在夜店門口出現，見她手持印有「HOLD ME」小手袋，拿着電話頻頻講不停，發現記者後超蓮即友善地打招呼，當大家問起她細佬何猷啟時，超蓮笑笑口說：「你哋喺度，邊夠膽出嚟？」隨即入場消遣。

全女班狂歡

原來猷啟一早到場，更於VIP區開定位等家姐，超蓮和猷啟會合後立即開了支香檳請客，夜場有見貴賓光臨，特意安排保鏢專責照顧他們。數杯香檳落肚後，超蓮情緒高漲，與數名女性友人結伴落舞池跳舞，此時超蓮除去皮褸外套，大騷索爆身形，於舞池內大跳辣舞，超蓮全女班圍實玩。

無禮出指 一名疑有酒意的男子，走近超蓮並手指指。	處變不驚 男子竟作勢掌摑超蓮，難得超蓮十分鎮定全身而退。	何超蓮成為街頭焦點所在，所到之處均成為途人的攝影對象。

玩至凌晨2時，猷啟見家姐有朋友照顧，先行和男友人離開，玩到唔願走的超蓮留在店內，直至凌晨3時才盡興地步出。單拖現身的超蓮，腳踏五吋高跟鞋，小心翼翼地行落樓梯，等候在外的記者蜂擁上前拍照，此時有酒客出言調戲，大聲地嗌：「你條底褲畀人影晒嘞！」超蓮聞言稍為扁扁嘴，面帶無奈地繼續慢慢行，想不到馬上又有另一名男途人上前，近距離指着超蓮，粗口橫飛地辱罵：「撩X佢！打X佢呀！星巴佢啦！」言語上用盡暴力仍未滿足，該男子更舉起手作狀一巴打過去，當眾受辱的超蓮雖與對方僅一步之隔，卻處變不驚，淡定地在對方身邊慢慢行過。對於被莽漢滋擾，超蓮說：「冇嬲！唔理佢，唔回應啦！」並說平日少有出街。由於沿途不少人取出手機爭相拍攝，超蓮刻意企埋一邊等候其他女性朋友，然後步行到附近截車，其間與警察傾了幾句，便上的士匆匆走人。

何超蓮十分有禮貌，向友人分派香檳。

超蓮在警員身邊截的士，然後登車離去。

唔理佢就得

昨日記者致電超蓮，問到前一晚被人周街撩兼用粗口辱罵，她說：「我唔知呀！（驚唔驚？）唔驚！聖誕好多人飲醉，淨係見到好多記者朋友啫。（有人用粗口鬧你？）發生呢啲都係費事望佢，唔好同佢有眼神接觸引起佢嘅注意！我超清醒，淨係飲咗少少。（你都處理得好好喎！）我識得處理，以前都有發生過，總之就係唔理佢就得啦！」

文、攝：追蹤組