亢帥克呻慘：遲3次即炒

「亞洲之子」亢帥克和古卓文前晚出席聖誕活動，早上才上完堂的亢帥克大賣口乖：「今日學幕後製作，獲益良多！（洗腦課程？）咁大個人冇咁易洗腦！」表示日日學新嘢，毋須考試，但就大爆新政策：「依家要打卡，遲三次就炒！」逼得他要飛的上堂，因此極贊成上堂計騷錢。至於古卓文則自爆尚未上堂：「之前唔喺香港請咗假，其實無端端要上堂有啲愕然，如果唔上堂就炒人咁就過分咗少少。」

看清誰是小人

為免加入炒魷一族，亞視藝員伍偉樂冬至當日整親腳都要跛住返公司請假，他說：「前一晚踢波整親，走嗰時太痛先call白車，已經拎咗6日假紙，28日返去做兒童節目。（傷咗都要返學好慘？）我合約寫住演藝訓練必須進行，公司要求到都要照做。」另外，被炒的張啟樂前晚在微博首次發聲，指自己過了「人生最溫暖的冬至」，陳綺雯亦同樣在微博留言:「離開後，看得更清誰是落井下石的小人。」

查小欣炮轟人治

亞視藝人怕被炒都不敢亂說話，早已離開亞視的陳煒則冇有怕：「認同黃秋生所講，合約有冇寫明要上堂，如果冇被炒好無辜，去勞工處問吓係咪可以告僱主。」她更寸爆說：「我睇《體通睇透》節目，當中講精神科，有妄想症同強迫症要趁早睇醫生。（如果仲係亞視藝員會否上堂？）Sorry，真係唔會！」查小欣前晚出席另一活動時亦加把口炮轟亞視：「缺席就炒人係非常無理，咁你下次都可以因為遲到或者早到而炒人啦！咁做法係人治，如果間間公司都係咁就慘！」她又透露無綫節目《爆足一周》明年會再開，一月便開會洽談細節。

文：音樂組