基仔「型」接假期 祖兒硬撐缺席有理
樂壇兩位天王天后古巨基和容祖兒前晚平安夜分別出席聖誕倒數活動，基仔開腔承認缺席四台頒獎禮，笑言覺得此舉很型！他又稱已向公司請假一個月，但絕不會秘婚。而祖兒支持基仔決定，好成績只是不出席「畢業禮」。
古巨基前晚平安夜連趕三場，先出席好友鄺美雲生日會，再到葵芳進行倒數活動，最後相約鄭伊健度聖誕。有指基仔放假外遊唔玩頒獎禮，他坦言已向公司請一個月假，明年一月開始放假，會去旅行及相約很久沒見的家人和朋友。
早前本報率先披露基仔缺席年底四台頒獎禮，基仔對此承認：「去咗好多年，你哋同我哋一樣，每年都感到很攰。（係咪被商台打壓，令你受打擊？）首先唔好特別針對邊個機構同邊個人，呢個係我個人決定選擇放假。」基仔稱曾與伊健討論頒獎禮話題，伊健覺得他今年有好成績都不去頒獎禮，是一件非常「型」的事，就是伊健一句給他打下強心針。
只在乎唱片獲支持
提到基仔有可能錯失五奪無綫「最受歡迎男歌星」機會，他謂：「既然決定得就唔在乎有冇獎，我在乎係隻碟得到人支持已經滿足。（只申請今年放假？）將來嘅答唔實，未知公司仲會畀幾多空間我。」基仔稱幾經辛苦才說服公司給假期，惟有其他地方幫公司賺多些錢作補償。
活動上，基仔被司儀當眾催婚，找來穿婚紗的模特兒拿着Ring形氣球，更要求基仔選Ring（緋聞女友叫Lorraine）還是男歌手獎，現場歌迷頻呼「結婚」，基仔笑言：「揀女Model啦！佢花咗咁多時間化妝整頭。」事後問他是否放大假去結婚？基仔即謂：「一定唔會結婚啦！」
祖兒讚男友新歌正
另外，祖兒前晚出席海港城廣東道的倒數派對「容祖兒加大力度玩轉廣東道聖誕Street Party」，擔任壓軸嘉賓的她以七彩星星Look乘坐星形吊臂出場，連場勁歌熱舞，場面High爆。祖兒透露完騷後會參加黃偉文的聖誕派對。問到男友劉浩龍可有份？祖兒笑道：「唔知喎，冇約。（咁聖誕禮物呢？）我唔講啦！」有傳因祖兒關係，帶挈師兄今年有獎攞，她稱：「邊關事！雖然我自己睇到有幸運兒嘅特點，但每個人都有自己實力去攞獎。」她更大讚男友歌曲《爛命鴛鴦》好聽：「梗係正啦。」
對於基仔缺席頒獎禮，祖兒坦言尊重對方意願：「佢覺得舒服咪去囉，又唔係返學。佢今年都交出好好成績，只係冇去畢業禮啫。」有傳祖兒打壓師妹林欣彤，她指這種無理指控很差勁，她都做過新人亦獲前輩提攜，有機會都會幫新一輩的歌手。
投資有道吸金冇停手
古巨基今年頻頻返內地登台，密密賺人仔賺到手軟。投資有道的他，三年前開始成立自家設計品牌，今年5月更以逾5,000萬買入中環擺花街一地舖，再加上手上至少有三個住宅物業，身家早已過億，難怪不在乎獎項。
代言收入：
杯麵廣告（香港及內地代言）
約800萬人民幣（約994萬港元）
休閒服飾廣告（內地代言）
約500萬人民幣（約621萬港元）
保暖內衣廣告（內地代言）
約800萬人民幣（約994萬港元）
補品廣告（內地代言）
約500萬人民幣（約621萬港元）
蒸餾水廣告（香港代言）
約200萬港元
時裝品牌廣告（香港代言）
約600萬港元連分紅
其他收入：
《告別我的戀人們》廣東碟約50萬港元
（雙白金）
演唱會加內地商演（約60場）逾4,800萬港元
總收入：逾8,880萬港元
文：音樂組