王祖藍年少尋歡 玩謝夏蕙姨

無聊搵黃夏蕙解悶

「記得中學嗰陣同同學排戲排到悶，見到電視報道新馬師曾（祥哥）嘅喪禮，當時啲記者猛問黃夏蕙『祥哥身後事搞成點？』佢多謝大家關心之餘，仲話：『近排好多人打電話嚟9485×××……』跟住我哋成班即刻話：『不如打喇！』仲要開晒speaker phone，點知個電話真係通！我哋一嚟就話：『唔該夏蕙姨呀！』當佢答係之後，我哋即刻癲咗，但都強裝鎮定話：『夏蕙姨你好！我哋好鍾意你、好支持你o架。』跟住我哋猛問佢近排點，佢就話我近排幾好，再問佢祥嫂點，佢就答：『你知啦，近排佢都好唔開心，有啲咁嘅事發生， 但我都代表佢多謝你哋。』去到呢度，我哋已經唔知講咩好，惟有求其問句：『咁祥哥呢？』夏蕙姨即刻答：『祥哥咪死咗咯！』我哋惟有即刻兜番話：『唔好意思，我哋係問祥哥啲身後事點？』跟住我哋收咗線之後笑到收唔到聲，估唔到佢真係喺電視機面前講咗自己個電話出嚟！」

「跟住我將呢件事講畀舅父聽，我舅父又打咗個電話一次，之後我再講畀湯駿業（歌手）聽，佢都未等我講完成個古仔已經即刻打電話喇，我都估唔到過咗咁多年，由十幾歲到廿歲喎，夏蕙姨都無轉過電話，而我亦都咁記得呢個電話，到依家我都背得出，真係好笑到爆炸，簡直係畢生難忘！有時見到夏蕙姨，我好想同佢講，我有打過電話畀你o架！」

自嘲體能差的王祖藍，最叻運動是踩單車。	王祖藍原來中學時曾玩電話整蠱夏蕙姨，相當調皮。	王祖藍雖是歌手，但就經常唱別人的歌曲，他大呻做唔番自己。

有好勝心無上進心

「我中學有個教唱歌嘅李老師好勁，佢可以教到一間村校嘅合唱團贏男拔萃。佢好黐線o架，以前教我嗰陣，真係晚晚都練到十點幾十一點o架。但嗰時我哋好勁，戰無不勝，跟佢嗰兩年我好開心，勁鍾意佢！但係到咗中二嗰年，佢突然之間決定去澳洲讀指揮，我聽到個消息後即刻喊到豬頭炳咁，我第一次咁唔捨得一個人，而且嗰個人只不過係飛去第二度啫。我記得佢宣布要走嗰陣，我哋成班由「choir（合唱團）」變咗「cryer（喊包）」 ，逐個衝出音樂室狂喊，大家都無辦法再唱落去，個情景好似做戲咁，所以我到依家都好記得個畫面。但奇就奇在個先生完全無喊，佢不嬲都好鎮定。」

熊黛林	王祖藍大談扮嘢秘訣，如扮熊黛林就要眼大到無focus。

「我同佢依家都有keep住見，我成日問佢我有無走音？因為佢好勁o架，六十個裏面邊個走音佢都聽得出！嗰時讀書，佢有提議過我考男拔萃，當時我心諗：『讀書唔好仲考男拔萃？』後尾我梗係無考啦，因為我想hea咯！我淨係鍾意比賽，我有好勝心，但係無上進心。」

唔怕扮嘢迷失真我

「話咗咁多當年，我都想講番其實今次新碟嘅主題係緬懷過去。雖然我都係歌手，但唔知係咪唱得人哋啲歌多，我登親台啲人都係叫我唱人哋嘅歌，好似陳奕迅、張惠妹咁，完全無人叫我唱我自己嘅歌！我想話我係歌手嚟o架，唉……好慘！真係埋沒咗……我連拍MV都覺得好迷失，明明自己係主角，但我硬係覺得仲係扮緊第二個人咁，完全唔似拍緊自己嘅MV，總之做唔番自己。雖然係咁，我依然好鍾意扮嘢，我覺得呢啲叫姣婆守唔到寡，扮女人我都鍾意，因為望到班師奶開心，我自己都會開心。」

「扮人有咩秘訣？要搵到個point，好似扮熊黛林咁，就係眼要夠大，所以我扮佢對眼大到無晒focus，好似盲咗咁。」

後記：大眾踩單車郊野上

當日與王祖藍的訪問地點是大埔海濱公園，碰巧有一群大埔教育學院的女學生踩單車路過，她們看到祖藍，即爭相要求合照，祖藍即有求必應，更與她們踩單車同遊海旁，兼齊齊向鏡頭做出勝利手勢，盡顯親民一面。說到踩單車，祖藍一樣有古仔講，他笑言當年的初戀，就是緣起自踩單車：「你睇我身形就知我體能幾差啦，嗰時成班人一齊踩，我永遠包尾，但我鍾意嗰個女仔唔單止等埋我，仲問我：『啲同學去到好遠，我哋使唔使追番佢哋？』我即刻神來之筆，問佢：『你畀我追，我咪唔使追咯。』跟住就追到喇。」

口述：王祖藍

筆錄：專案組