葉麗儀戥後輩 瓣瓣掂辛苦

葉麗儀入行四十多年，唱過不少膾炙人口的歌曲，作為教徒的她，卻首次推出福音專輯，她表示專輯的所有收益都會用作重建溫哥華教區學校之用。為慈善盡心盡力的Frances，近年亦不時為慈善登台出騷，藉以生命影響生命。

《上海灘》多人唱

憑一曲《上海灘》紅遍全球華人地區的Frances實在「紅足咁多年」，不過，她就指出在英國發展時都有「難頂」的時候，間接令她回流香港，她說：「最辛苦都係70年代，英國唱片公司話想搞啲gimmick，要我揸住隻雞插住對筷子影唱片封套，當時我好硬頸，唔肯影。加上東南亞市場開始發展，我都漸漸地返去香港。」

回港後，正碰巧遇上《上海灘》令她事業更上一層樓，而《上海灘》一曲更被不同歌手翻唱演繹，問到Frances最欣賞誰人的演出？她就謙讓地笑說：「其實只要鍾意呢首歌嘅人都可以唱，我亦都聽過菲律賓人唱，咁多人翻唱反而係我嘅福氣啦。」

無暇練歌難壓台

Frances作為香港樂壇的表表者，見證着樂壇的轉變，她都承認現今的歌手實在相當辛苦，她說：「我初出道嘅時候，只要五官端正，聲線OK就得。但依家嘅藝人又要瓣瓣掂，又要拍戲又要做騷，冇乜時間練歌。」她又指出現今歌手的難處就是「冇時間」，她說：「有啲歌手因為太忙，所以做現場節目前都冇時間綵排，咁樣自然會唔夠信心兼壓唔到台，其實係好可惜嘅一件事！」

文：音樂組

攝：謝國華