陳祉妤男友如衣服 質地要好
早前傳出有新歡的名模陳祉妤（Balia），澄清感情生活仍是一片空白，雖然今年聖誕新年佳節冇仔陪，但Balia直言不心急拍拖，熱愛時裝的她比喻揀男友如揀衫，兩者同樣要精挑細選，才能找到筍盤！
早前因與前夫性格不合而宣布離婚的Balia，經過一段時間淡忘傷痛後，心情已重新振作過來，並積極為未來人生鋪路，除了重返天橋界，獲得不少大型品牌垂青，Balia又打算出書做才女。早前Balia為時裝品牌Laurel示範一系列冬裝，穿上皮草的她顯得高貴大方，她笑說：「自己好鍾意時裝，鍾意品質好嘅嘢，着上身好舒服。」後更表示揀男朋友都要像揀衫一樣心思細密：「揀衫最緊要質地好，揀男仔都係同一個道理，唔好睇表面，心地同上進心好緊要。」早前她被指與一名新歡食飯拍拖，她否認說：「只係普通朋友，冇可能發展，其實身邊好多男性朋友，都有追求者，但都係嗰句要細心觀察，唔想強求太多，一切隨緣啦！」
佳節不愁寂寞
而聖誕與新年佳節即將來臨，Balia亦未有因為見到別人一雙一對而寂寞，她說：「我係一個幾獨立嘅女仔，唔使工作時鍾意做運動打Golf，心靈上好滿足，更何況我身邊都有好多朋友陪我一齊過節，屋企又有親人同狗狗陪，所以真係唔覺慘，內心好安穩。」
出書分享品味
從事模特兒行業多年的她，表示希望可以將自己的時裝心得和扮靚之道結集成書，她說：「其實做呢行咁多年，從中學到好多嘢，好多行外人都以為做Model只係一個人肉衣架，但我自己係呢行，就覺得呢個說法唔正確，欣賞時裝係可以提升個人品味，亦都認識到每個品牌嘅成功秘訣，所以我想將自己喺呢行吸收番嚟嘅衣着同生活品味，寫成書同人分享一下。」
文：專案組
攝：吳文聰
服裝：Laurel