糖妹恐懼焗爐聖誕捱凍Cake
黃山怡（糖妹）聖誕節將會撇低大隻男友何浩文（Dominic），密密工作搵真銀，更寄望兩人接Job接到手軟。雖然她入得廚房煮幾味，奈何患有「焗爐恐懼症」，多年來都未能親手炮製靚蛋糕給家人。
組合糖兄妹成員糖妹一向是廣告商寵兒，過去一年密密做代言人吸金，即使在聖誕佳節，仍然不放過搵銀機會，放棄與男友拍拖度佳節，實行工作大過天。她說：「聖誕正日我將會喺工作中度過，望都望大家喺工作中度過啦！」
除夕出碟好意頭
為食的糖妹愛吃又愛煮，經常下廚的她唯獨對焗爐有陰影。她說：「試過用焗爐整嘢食，最後搞到跳Fuse（保險絲），之後就唔敢再掂焗爐。」她遺憾未能親手焗蛋糕給屋企人：「每次我整親都係凍Cake，好冇聖誕氣氛呀！」提到最難忘的聖誕節，竟是在入行前，她與台灣天團S.H.E.封路獻唱：「當時我同糖兄（潘雲峰）寂寂無聞，但可以同咁多前輩唱歌，真係好大嘗試，糖兄仲緊張到胃痛。」
糖妹指糖兄妹的大碟誕生於兩年前除夕，大賣收場，今年將會再接再厲。她謂：「除夕出碟好意頭呀！當為糖兄妹喺2012年畫上完美句號。」雖然年尾出碟未能在樂壇頒獎禮分一杯羹，但糖妹坦言只想好音樂，而非爭獎。問到新一年想不想加人工？她打趣說：「我哋係自僱人士，自己努力啲當加人工。」
文：音樂組
攝：李廣成
場地：沙田新城市廣場