Jessica C. 瘋狂掃貨撩動B情
「警鐘胸」混血女模Jessica C.每年聖誕都會返美國與家人歡度，今年仲會帶埋男友Mr. Bond！她日前特地來個Christmas Shopping，買定禮物畀家人之餘，當然亦有預埋男友，她見到BB衫時仲母愛氾濫，揚言第時最少要生三個先收工！
在香港「打工」多年的Jessica C.（JC），每年聖誕都會放棄賺錢的黃金機會，返美國與家人共享天倫，今年她還會帶埋洛杉磯男友Mr. Bond見家長，搞到Mr. Bond緊張到騰騰震！日前她抽了半天時間去瘋狂掃貨，為家人及男友買聖誕禮物，來自大家庭的JC絕不手軟，為妹妹買了多件大褸及化妝品，亦為男友揀了幾件款式簡單的男裝衫，她說：「佢着衫好簡單，唔鍾意太花巧，我最鍾意佢着短袖衫，可以騷到佢強壯嘅手臂！」
「起碼生3個」
JC的兩個妹妹今年先後誕下兩名子女，為她增添了兩個姨甥！她到童裝部時更睇到唔捨得走，每當見到細細件的童裝鞋或衫，她都不禁高八度大嗌：「So cute！」她早前自爆子宮有水瘤，但仍無阻她想為人母的決心：「我來自一個大家庭，第時起碼要生3個BB！」長時間與男友分隔兩地的JC，平時惟有靠科技聯繫，日日都要煲個幾鐘頭電話，但她不希望男友上網看有關她的新聞：「佢同我一樣睇唔明啲字，單睇圖片，驚佢會亂諗嘢！」
文：專案組
場地：又一城
服裝：Agnes B.及Juicy Couture
化妝：SHISEIDO