朱千雪慨嘆 肥妹冇人追
應屆香港小姐季軍朱千雪在溫哥華長大，以前過的雖然是白色聖誕，但慶祝方式卻很中式，聖誕節會與家人在家裏打邊爐。講到聖誕節可有浪漫事情發生？朱千雪自嘲說：「以前咁肥邊有人追。」
外國長大的應屆港姐季軍朱千雪，過往在溫哥華過的都是白色聖誕，天氣寒冷白雪飄飄，朱千雪指每年聖誕節的指定動作是與兩個妹妹玩大富翁及打邊爐，認真中西合璧！她說：「因為每年聖誕，加拿大都已經落緊大雪，所以都好少出街，唔知點解每年嘅聖誕都會一年一次玩大富翁，我哋屋企仲會趁嗰日打邊爐慶祝。」
佳節樂享天倫
加拿大的聖誕節着重家庭相聚，問朱千雪有沒有男仔在這浪漫氣氛下追求她，朱千雪笑說：「冇呀，嗰時咁肥，邊有人追！其實嗰邊嘅聖誕節都係同屋企人過，大家食吓嘢，傾吓偈共享天倫。」朱千雪參選港姐期間進行「地獄式減肥」瘦了兩個碼，現時苗條得多，她說：「減肥後最享受係着衫驚件衫太大，以前就好多One Size嘅衫都着唔落，依家都保持跑步、游水，靠做運動減磅。」
靜待真命天子
雖然現時相當省鏡，但朱千雪笑言一樣冇人追：「可能人大咗比較難識朋友，自己又少出去玩，所以更加難識到男仔，不過唔心急嘅，慢慢等一個心地好，又搞笑嘅男仔出現啦。」選美入行後朱千雪發展也頗順利，擔任《勁歌金曲》主持竟然好少NG，表現備受讚賞，她說：「自己一收到稿就即刻背到熟晒，自己搞氣氛經驗唔夠，惟有做好最基本嘅嘢，同埋有崔建邦喺度都定好多！」
採訪：影視組