吳彥祖呻齋睇冇得掂
型男吳彥祖（Daniel）開始「食長齋」，自爆老婆有喜後密密進餐，由完美model身形更上一層樓，他說：「依家佢個pat pat同個胸好大，但淨係可以睇，唔掂得！」雖然Lisa S.波大籮大，不過Daniel「有得睇，冇得食」，樂做苦行僧！
吳彥祖、張震及劉燁三位型男前晚出席英皇電影《王的盛宴》首映禮，Daniel當晚未有帶同懷孕妻子Lisa S.出席，他指太太身體抱恙：「佢唔舒服，太血腥會嘔，之前睇拳賽見到人爆缸都要走先。」他又指太太身形明顯有所變化，「佢以前好瘦，依家pat pat同胸好大，但淨係可以睇，唔掂得嘅，我幾鍾意佢多番啲肉，但真係唔掂得。」
勾手指對親家
雖然兩人剛剛宣布有喜，但Daniel已寄望盡快多追一個，讓囡囡成長期間有個伴，不過就再三強調希望囡囡生得醜，擔心將來畀人溝，但言猶在耳，劉燁未幾便在微博上留言指與Daniel結為姻親：「兩爹背着媳婦把娃的大事定了。」更附上二人勾手指的相片。
同場的張震被問《一代宗師》是否已終極完成，張震支吾以對地說：「係啦！依家應該做緊後期，但仲未收到通知做配音。」他指電影前後拍攝接近三年，不過仍比《2046》短，（《2046》拍攝共五年），他說：「同導演（王家衛）次次都有驚喜，都習慣佢嘅方式，導演慢工出細貨，追求完美!」同場還有惠英紅、秦嵐、陸川等。
文：影視組