梁烈唯跑出 全靠杏兒之吻
胡杏兒前晚在台慶頒獎禮紅地氈上，與舊愛黃宗澤零交流，雖然她失落視后，但仍為出爐女配角、好姊妹胡定欣慶祝，同場的梁烈唯表示因為賽前得到「杏兒之吻」，帶來好運所以奪獎！
勇奪無綫「最佳女配角」的胡定欣，早前分別在馬來西亞及新加坡獲頒女配角獎項，可謂連闖三關，難怪好姊妹胡杏兒落空無獎攞，都專程盛裝替她慶祝。
前晚胡定欣、梁烈唯、古明華於頒獎禮後，到尖沙咀一間日式食肆開私人派對慶祝，率先抵埗的杏兒坦言戥他們開心。問到在頒獎禮紅地氈上，與前男友黃宗澤同台卻零交流，杏兒表示：「冇咩？我哋冇嘢o架喎，大家係同事，我都有同佢打招呼。」有傳黃宗澤撻着新劇拍檔周麗淇，杏兒似乎不太相信，更笑謂：「係咩？佢都唔會，啲人搵啲嘢出嚟寫啫！」
黃日華叮囑要謙
至於「飛躍進步男藝員」得主梁烈唯，則賣口乖表示在頒獎禮前，得到杏兒的幸運之吻，所以才得以獲獎，氹得杏兒即場再吻賀唯唯。唯唯笑言賽前踎在馬桶上，想好致謝辭，不過仍忘記多謝黃日華、苗僑偉夫婦。
其好友張智霖、袁詠儀、苗僑偉等紛紛在微博祝賀他，前晚亦有到場慶祝的黃日華，在微博亦留言給唯唯，希望他不要被勝利而沖昏頭腦，要繼續謙虛、努力。唯唯於台上多謝女友Tina，苗僑偉夫婦亦讚他是有承擔的好男人。
古明華續約無綫
同場的胡定欣成功過「三關」，直言好興奮，表示香港才是主場，如果食白果會好醜，故特別重視該獎項，她笑言：「我發覺自己喊個樣好醜，今次要靚，所以壓抑情緒忍住唔喊。」而古明華撼贏陳國邦奪「最佳男配角」，他指太太和女兒都去了旅行，當致電給女兒告知好消息時，女兒開心到喊，他又表示續約無綫成數很高，無綫條件方面亦很有誠意，問會否擔心被指以合約換獎？古明華謂：「唔會，乜都有人講，係投票後，無綫先同我傾約嘅。」
文：影視組