林峯食白果 二百宗投訴轟不公

今年無綫為台慶頒獎禮搞搞新意思，玩全民投票選出心水視帝、視后及最佳劇集獎項，短短幾天錄得1,542,922票，擁有大批fans的林峯原本坐定粒六攞硬視帝，沒料最後由黑馬黎耀祥勝出，無綫宣布視帝、后票數分別為各11萬幾，但有網民卻於討論區質疑票數統計，無綫外事部副總監曾醒明昨日透露，於總票數當中，並非人人也完成投三票，更謂：「名單內有10個男主角、10個女主角，24個最佳劇集，即係分咗44個選擇，同埋今次機制好嚴，如果重複投票會抽走，不過都唔會公開票數。」

fans高層力撐

雖然阿峯明顯在頒獎禮上未公布視帝賽果時已經一副失落表情，似早已知自己將跟視帝寶座失諸交臂，但最後都接受現實，並回復笑容，完成頒獎禮後先於電視城門外與數十fans慶祝，期間有fans為偶像失獎哭泣，阿峯見狀亦有安撫，及後便與徐子珊到灣仔吃日本菜，慶祝子珊獲「我最喜愛的電視女角色」，同場還有高層樂易玲、梁家樹、黃智雯、林夏薇、潘嘉德等。問到失落視帝心情，阿峯謂：「少少失望係冇辦法藉呢個機會向投我嘅fans同朋友講多謝，（你係大家心目中視帝！）多謝！（之前講過今年攞獎係right timing！）因為我好鍾意套劇角色，本來諗住有機會上台，我想同頒獎嘅葉德嫻前輩講，邀請佢睇我下個月嘅演唱會。（佢讚你靚仔！）我想講我係實力派。（輸咗畀祥仔喎！）頭先後台見到佢，遺憾大家一直未有正式合作過，佢係我好尊重嘅前輩。」昨日阿峯大清早便返回橫店繼續為新劇開工。

三屆「視帝」黎耀祥得獎後「吹喇叭」飲香檳與粉絲慶祝。

黎耀祥三奪「視帝」後昨日即開工拍劇，馬海倫上前恭賀。

而祥仔前晚完成官方刊物拍攝後，便獲數十fans開香檳慶祝，並送上banner恭喜偶像，心情興奮的祥仔還「吹喇叭」飲香檳。昨日祥仔即投入新劇《傳愛事務所》拍攝，透露前晚未有特別慶祝，他謂：「我返屋企食隔夜嘢滷水鵝。（兒子有咩特別表示？）個仔好cool同有型，只係喺微博恭喜我。（宣布視帝時馬國明好愕然？）我都好愕然啦！（贏獎會唔會加騷錢？）我都想加，以前一直偏低，起碼加20至30%。」

祥仔由葉德嫻手上接過視帝獎座。

林峯與徐子珊雖然落敗，但有高層樂易玲等人撐。

質疑賽果冇辦法

對於視帝、視后票數受質疑，祥仔謂：「公司今次請咗另一間公司點票，好嚴謹，冇遊戲係絕對公平，第一次咁樣係有改善空間，大家要體諒。（有人投訴唔滿意視帝結果，覺唔覺係阿峯fans？）唔會，大家係良性競爭。」談到視帝賽果無綫接獲24宗投訴，祥仔說：「都冇辦法，唔會每個人都鍾意自己，唔會唔開心，我都接受意見。」

前晚整個頒獎禮，無綫共收到63宗投訴，除了24個不滿意視帝賽果，亦有分別10個及9個投訴不滿視后及最佳劇集結果，3個不滿意時間控制；而通訊局則收到110宗投訴，當中包括賽果不公、不滿未有公開所有投票結果等。而頒獎禮平均收視36點，有231萬人次收看，最高收視41點，乃頒發《最佳劇集》時錄得。

文：影視組