張暖雅遇老千騙財騙婚
藝人賈曉晨（JJ）和o靚模張暖雅穿起婚紗，卻有截然不同的感受。前者甜蜜地視男友樊少皇為結婚對象，更透露對方在戀情備受輿論壓力時曾向她求婚；後者則憶起被騙財、騙婚的慘痛經歷，實在同人唔同命。
JJ、張暖雅及樂壇新人蔚雨芯昨日為婚紗展擔任模特兒。穿低胸晚裝谷出事業線的張暖雅，力拚穿上美人魚婚紗的JJ，張暖雅更自爆被騙婚，實行由服飾以至話題，跟JJ爭風頭。原居上海的張暖雅說當年來港旅行時，認識了一名時裝設計師，雖然對方沒有錢，但她仍打算和他結婚，但原來對方是老千一名：「我哋準備喺香港結婚，父母都買咗機票嚟香港。點知佢成日同我攞錢，話幫我寄運傢俬要錢，訂迷你倉存放又要錢，前前後後拎咗十幾萬，之後又暗示叫我投資佢間時裝店，要百幾萬咁多，我話冇，佢就即刻變晒，仲send whatsApp講分手。」但她坦言自己因禍得福：「我要多謝佢，因為咁我先嚟咗香港，識到依家老闆，加入咗娛樂圈。」
想放假探男友班
而蜜運中的JJ，指自己因工作關係穿過很多次婚紗，笑言怕現實生活中沒有機會穿。問到她與男友樊少皇有沒有結婚計劃？她坦言沒有特別去想。至於是否視對方為結婚對象？她說：「拍得拖都諗住結婚。（佢點諗？）我唔知，要問番佢。」當記者指樊少皇曾結婚時，她即急急澄清：「佢冇結婚。（不過有小朋友？）都好多年前嘅事。（佢有冇向你求過婚？）有講吓，不過唔係正式。當時大家都好大壓力，互相安慰時有講。不過依家冷靜啲，希望正式考慮吓先。」她又表示希望與男友一同度聖誕佳節，但可惜對方要拍戲，故她希望公司批准她放假，好讓她去探班。
文：名人組