姚子羚坦蕩蕩拒愛弱雞男
沈卓盈（Jess）入行多年，緋聞寥寥可數，屬圈中乖乖女藝人，演繹冷靜聰明角色，入木三分的Jess，私底下卻是一個很會關心朋友的熱情小良伴，圈中不少靚女藝人都是她的知心好友。她將一連四星期跟大家分享她與密友們的小秘密，頭炮便是型格十足的姚子羚（Elaine），子羚更向Jess奉上不少戀情秘密，包括她想小鳥依人，不想有位甚麼也不及自己的男友。
名列恨識榜三甲
沈：Elaine，我覺得你係一個好有性格嘅人，同你相處覺得你好爽朗，令人感覺好舒服！
姚：但唔識我嘅人，會覺得我好寸，所以好多時我都唔係咁敢講嘢。
沈：我無呢種感覺，不過，你確係少笑啲！其實我唔出聲，都會畀人覺得寸，但其實我同你都係大笑姑婆，只係有啲人誤會咗我哋。
姚：我反而覺得你sexy，我身邊有好多男性朋友，都想我介紹女仔畀佢哋識，你一定係頭三位佢哋想識嘅女藝人，其他兩個就係龔嘉欣同苟芸慧，不過，你就係最多人想識。
沈：嘩，好開心呀！其實我都有唔少朋友想我介紹你畀佢哋識o架！你除咗有性格之外，我仲好鍾意同你傾偈，因為唔會有隱瞞，大家都信得過大家，我知你依家係單身，其實你對感情有乜嘢睇法？我覺得你唔需要靚仔男朋友，反而希望有一個可以照顧到自己、教到自己進步嘅男朋友。
姚：啱，弱過我真係唔得，我希望我男朋友所有嘢都強過我、叻過我，等我可以做佢後面嘅小鳥依人，當然仲要係真真正正照顧到我，好有人生計劃，知自己做乜嘅人，呢樣嘢好重要。
男友同圈較安心
沈：會唔會考慮圈中人？定抑或覺得圈中人無乜安全感？
姚：我唔覺，雖然我都偏向搵圈外人，但其實我都曾經同圈中人拍過拖，覺得唔可以一竹篙打一船人，大家同一個圈都有好處，因為做乜都會有人跟住，如果唔係，偷食都無人知。
沈：我都試過有圈中人追自己，但我唔想大家同一個圈做嘢，因為如果男朋友係做其他行業，我可以見識多啲唔同嘅嘢，我覺得咁對我仲好啲！同埋同一個圈做嘢，分開咗，撞口撞面會有啲尷尬！
姚：但我ＯＫ喎！之後同對方見番都無尷尬，見到面咪hello，會打招呼！依家我偏向搵圈外人嘅原因，因為始終我哋行業難就時間，如果另一半有固定返工時間，會易夾時間一啲。
沈：當年點解同圈中男友分手？
姚：因為性格，大家性格唔夾，再浪費時間拍拖落去都無意思，所以就分手。
熟落咀嘴更完美
沈：Elaine拍過唔少電視劇，亦同過唔同類型嘅男演員合作過，覺得邊個同你最有默契？
姚：黃浩然，因為大家合作好有默契，遇到乜嘢問題都可以好坦承咁攞出嚟傾，好似拍《我的如意狼君》嘅時候，我叫佢做得不羈啲，因為佢愈不羈愈冧女，最好似哥哥張國榮咁，戲入面啲女主角先會對佢死心塌地，呢啲嘢平時演員與演員之間，就唔好意思攞出嚟講，我同佢就唔需要避忌！同埋，有時同男拍檔拍一啲眼神接觸戲，會幾尷尬，但望住浩然，又唔會覺得，唔知係咪因為佢已經結咗婚，所以，無咁尷尬，總之，同佢合作係幾舒服。
沈：講起同男拍檔拍一啲親密啲嘅戲，我上年、前年同一時期錫過唔同男演員，吳卓羲、馬國明、謝天華，我覺得最緊要私底下熟落，互相信任，件事就會完美。
姚：嘩，錫咁多個？邊個最好錫呀？
沈：三個都OK嘅！Elaine你真係鬼馬！問番我轉頭，好多謝你做我嘉賓，希望我之後有機會一齊拍劇合作啦！
文：影視組
攝：吳文聰
場地：台灣一品花雕雞（銅鑼灣）