廖碧兒dry爆北上搵仔
近年轉戰內地拍劇的廖碧兒（Bernice），前晚榮升桌球俱樂部老闆娘，並與曾傳出緋聞的生意拍檔Damon及其太太鄭文斯同場，但兩女齊聲表示絕不尷尬，鄭文斯還親自拉攏老公來張三人合照，並以行動闢謠。令「單身」的Bernice不禁大呻冇人追，坦言恨拍拖的她更不抗拒北上搵男友！
廖碧兒前晚以短褲仔造型出席有份投資的桌球俱樂部活動，由於早前她被拍得跟一班外籍男士在夜店耍樂，其中一位是無綫製作資源部助理總監鄭偉強的美籍女婿Damon Howe，因而傳出緋聞，前晚兩人碰頭，而Damon太太鄭文斯（Mancy）亦在場，但Bernice表示絕不尷尬：「Damon係其中一個股東，影到我同佢玩嗰晚佢太太都在場，當日係佢兩個嘅結婚party。（恨拍拖？）我都想，朋友有幫手介紹。（下次避忌啲？）冇呀，大家一場朋友，可能係你哋之前唔識佢。」又大呻現時冇人追，記者指她是「英文人」，是否想與外國人拍拖？她即笑言現正學習普通話，揀男友不介意國籍，更不抗拒北上搵男朋友！
吳彥祖一擊即中
Mancy被問到老公與Bernice傳出緋聞，自言一早認識Bernice，故見面沒有尷尬：「得啖笑，老公被偷拍嗰晚我都在場，佢哋係合作partner。」最搞笑是記者叫三人影合照時，Mancy大方叫老公過來一齊拍，還在他耳邊說要打破謠言。
有份投資的準媽咪、名模Lisa S.與老公吳彥祖（Daniel）恩愛到場，問Lisa懂不懂玩美式桌球？Daniel搶着說：「佢天生就識，隻手咁直。（你哋一齊玩？）最多玩一次，就有咗BB（一擊即中）。」Lisa聞言即大叫尷尬。問她BB會否在肚中行catwalk，吳彥祖竟大嗌怕怕：「佢將來讀哈佛就得，千祈唔好靚到可以做model。」此外，提到好友何超儀日前就捲入藝人食肆吸毒事件開記者會澄清，並向黃浩發律師信，Daniel表示：「係唯一辦法控制佢呢個人（黃浩），（信佢哋冇吸毒？）喺餐廳一定冇，點會咁蠢？」
文：名人組