郭富城型男格
格仔服飾起源自英國，充滿英倫風味，classic得嚟且永遠不會過時，所以很多時裝設計師都愛用格仔元素去設計服飾。格仔在今個冬日依然盛行，無論是服裝或配飾都很大受歡迎，男女都總有捧場客，易於配襯和carry，能添上一身活力時尚感，是casual、型格之選。圈中一眾型男索女亦不時愛以格仔look出席活動，名模陳嘉容大讚郭富城、古天樂則有型非常。
郭富城
「幾得意，條格仔褲唔易carry，但佢都着得好睇，成個look好sharp，帶啲書卷味。」
古天樂
「好有型，男仔着格仔西裝褸襯淨色褲一定冇走雞，加上佢身形好fit，slim cut嘅設計一啲都難唔到佢。」
賈曉晨
「好得人驚，娘味好重！其實可以換條hot pants，襯黑色長boots，型得嚟又可以騷吓長腿。」
Jessica C.
「條裙cutting着到佢冇晒身形，一啲model嘅味道都冇。襯黑色中長boots有啲娘，換對過膝長boots，或者加對黑色絲襪，襯對高踭鞋，會靚好多。」
苟芸慧
「件衫本身OK，但對leggings同對boots出事，對腳望落短咗，換對米色或黑色嘅高踭ankle boots，會靚好多。」
撞裙
泳兒和謝安琪不約而同着上民族半截裙示人，不過陳嘉容就覺得謝安琪略勝一籌：「謝安琪着得較有層次感，睇得出有花心機去配襯，化妝、髮型都襯番個民族feel，成個total look好match。泳兒都着得OK，但以白色衫襯呢條裙就plain咗啲，而襯中長款黑色西裝褸就有啲格格不入，上重下輕。」
容祖兒
「好好睇，紅黑向來係絕配，襯紅色鞋好聰明，成個造型好突出，散發青春活力。」
陳嘉容Profile
陳嘉容，香港著名模特兒，曾為各大國際品牌行時裝騷，在時裝界打滾多年，在時裝方面的理論及實戰都難不到她，近年更為電視時裝節目擔任主持，化身stylist教人配襯衣着打扮。