苟芸慧女神飛躍 后起之秀
女神苟芸慧今年在《萬千星輝頒獎典禮2012》首獲提名，更叫兩飛「最佳女配角」及「飛躍進步女藝員」，她最想奪得「飛躍」獎項作為自己進步的肯定。努力學習演戲的苟姑娘坦言夢想做視后，希望結婚前能達成心願。
攞獎平常心
人氣與實力很多時都不成正比，雖然苟姑娘深受網民歡迎，但她承認自己演技尚有不足之處，能在台慶頒獎禮有提名已感榮幸。
今年係第一次喺台慶頒獎禮有提名，仲一次過有兩項提名「最佳女配角」同「飛躍進步女藝員」。當知道自己有提名好興奮又緊張，因為提名係一份肯定。令我得到提名嘅《飛虎》同《怒火街頭2》分別係大概兩年前同埋一年前拍嘅，其實自己依家睇番兩套劇都覺得分別好大。睇番《飛虎》都唔知自己做緊乜，只可以畀50分僅僅合格。一年前拍嘅《怒火街頭2》就真係見到自己進步，我喺呢套劇佔嘅戲份多咗好多，內心戲都好有挑戰同埋發揮機會，鄭嘉穎、胡杏兒、監製陳維冠都幫咗我好多，呢套會畀自己70分。問我最想攞邊個獎？我會揀「飛躍」，可以肯定到自己由乜都唔識去到有進步嘅階段，攞獎平常心啦！
35歲前結婚
現時單身的苟姑娘專心事業，未有心情諗拍拖，但她希望在35歲前結婚，更想成為人妻之前一嘗當視后滋味。
雖然今年係第一次有提名，但係我同其他鐘意演戲嘅同事一樣，都夢想有一日可以攞到視后。我相信只要肯努力、肯付出，希望可以喺結婚前Dream Come True成為視后！不過我冇咁快結婚，依家工作放喺第一位，如果遇到好啱嘅人唔介意發展，唔啱就一定唔會浪費時間，唔想分心，令工作同愛情都兩頭唔到岸。揀伴侶樣貎亦唔重要，最重要係溝通到、孝順同埋有愛心，依家嘅目標係希望35歲前結婚。
睇好岑麗香
雖然被外界睇好有機會攞獎，但苟姑娘認為岑麗香與黃智雯亦表現出色，就算敗給兩人亦沒有所謂。
雖然我想攞「飛躍」，但客觀去睇，我就睇好黃智雯機會大啲。佢今年「關二嫂」嘅角色真係做得好好，觀眾印象好深。香香（岑麗香）我就覺得佢好有機會攞「我最喜愛的電視女角色」，佢演「香乃馨」呢個角色表現好出色，佢一直都好努力，希望香香嘅付出同埋努力都得到一份肯定。外間雖然經常將我同香香比較，但係對我哋嘅感情絕對冇影響。反而因為呢啲新聞大家溝通更加多咗，大家更加了解。其實依家有乜開心，或者需要鼓勵，香香都係我其中一個傾訴對象，我哋永遠都係好姊妹。
最想演喜劇
苟姑娘常被派演陷入三角戀的苦情角色，其實她笑點很低，一個爛Gag已氹得她哈哈笑，名副其實的開心果。
其實諗番之前做過嘅角色咁啱得咁橋都係陷入三角苦戀，好似《怒火街頭2》就出現喺鄭嘉穎同胡杏兒中間；《飛虎》又同馬德鐘、梁烈唯，最近一部完成嘅作品《仁心解碼Ⅱ》又同陳國邦、蕭正楠有三角關係，都想問吓監製我點解會咁多三角戀，哈哈。同埋以往都係演悲情角色，啱啱拍完嘅《仁心解碼Ⅱ》都係做嚴肅嘅角色，其實忍笑都忍得好辛苦，見其他演員玩得好開心，但我都唔敢放肆大笑，要保持一個好低沉嘅情緒去開工。可能我形象畀人哋嘅感覺係咁，其實我都可以做一啲開心搞笑角色，最近同歐陽震華拍嘅《情逆三世緣》就做個輕鬆搞笑角色，個人都冇咁沉重，開心咗好多。同埋同Bobby開工，都好多嘢學，最難學嘅係點樣好自然去演戲。
最驚飛紙仔
最初拍劇因為中文唔好，劇本每句對白幾乎每個字都要加拼音，全部對白都係靠死背，基本意思係明白嘅，但係就會畀啲俗語考起。好似廣東話「殺你」，最初唔明點解，最初祖藍同我講「殺你」，我話做乜要殺我，依家都仲畀祖藍笑緊！同埋以前最怕拍劇要「飛紙仔」，因為唔夠時間準備。但經過跟老師學習中文三年，依家中文程度已經好好多。
口述：苟芸慧
文：影視組
攝：劉智源
場地：Habitu（銅鑼灣）
服裝：Calvin Klein
化妝：亨利
髮型：Oscar@HAiR