胡定欣「啞女」爭獎戲勢如虹
無綫《萬千星輝頒獎典禮2012》「最佳女配角」之爭進入白熱化，今年是《拳王》「啞女」胡定欣鬥《缺宅男女》「關二嫂」黃智雯的局面，論聲勢定欣近期連奪兩海外「女配角」大獎，加上有正在播映的台慶劇《大太監》造勢，相信定欣能打低智雯，在入行十年的特別日子成功「過三關」。
今年無綫台慶頒獎禮「最佳女配角」之爭原本互有攻守，《拳王》「啞女」胡定欣與《缺宅男女》「關二嫂」黃智雯鬥得難分難解，但「啞女」近期默默起革命，先後奪得馬來西亞Astro及《第17屆亞洲區電視大獎2012》「女配角」大獎，加上她主演的台慶劇《大太監》正在出街，由聲勢到氣勢上也壓下智雯，相信定欣大有機會「過三關」。
入行十年的胡定欣說：「自己對《拳王》嘅角色好有信心，啞女拳手係好難遇到嘅角色，拍嗰陣好辛苦，學手語、學泰拳。啱啱攞咗兩個海外獎加強咗信心，但今年對手好強，有智雯、茵媺、韓馬利等等，自己有信心攞獎嘅！」定欣透露準備以好性感閃爆透視裙出席頒獎禮，為得獎扮到靚靚做足準備。
寧揀飛躍進步獎
「關二嫂」黃智雯於今屆頒獎禮叫兩飛，憑《缺宅男女》劇集提名「最佳女配角」及「飛躍進步女藝員」，智雯表示若要在獎項中二選一，對「女飛躍獎」會睇高一線，她認為老友胡定欣的啞女角色表現出色，絕對有足夠資格問鼎女配角獎。
去年智雯角逐「女飛躍獎」敗給馬賽，捲土重來的她，「關二嫂」是個乞人憎的角色，她說：「呢個角色同以往演過嘅好唔同，再唔係斯文乖乖女，套劇出街時係咁畀人鬧，話我做得好衰，起初會唔開心，但諗深一層，即係代表觀眾有留意角色，接受咗就冇事，愈畀人鬧愈開心。」
陳茵媺捧羅蘭姐
另外，有力爆冷的則要數《大太監》的陳茵媺，她與黃浩然的戲中淒美故事，或會博得觀眾投以同情一票。陳茵媺說：「女配角我鍾意羅蘭姐，自己就平常心，亦冇特別拉票，我最想《大太監》攞「最佳劇集」。」
服裝：b+ab
場地：EL CID 西班牙餐廳（銅鑼灣）
文：影視組