杜汶澤出賣自己放笑彈

杜汶澤入行十八年，明年將挑戰自己搞talk show，形象幽默搞笑的他，一直都有投資者想跟他合作做talk show，但阿澤一直婉拒，因覺得壓力大，如今接受挑戰，全因想給觀眾歡樂：「我一向都唔太鍾意做talk show，因為要記好多嘢，多年前太陽娛樂老闆話想同我一齊搞，我都婉拒，之後公司投資咗《低俗喜劇》，結果收咗三千萬票房，我覺得香港觀眾實在畀咗太多嘢我，加上近幾年社會風氣不佳，香港人真係好需要娛樂嚟踢走一啲負面情緒，所以我覺得自己都好應該克服恐懼去試吓做。」

爆喺酒店見聞

talk show界有不少表表者，當中包括棟篤笑之王黃子華，問阿澤會否擔心被比較，阿澤說：「唔怕！因為講我自己由細到大嘅經歷，係屬於我自己嘅嘢，好似當年喺酒店當侍應，見盡圈中有名藝人，好似見過萬梓良飲醉酒、劉嘉玲同梁朝偉生日嚟食飯、黃家駒咁，最好笑嘅係我第一次見吳君如，就係喺呢間酒店，當時我覺得好出奇點解咁肥嘅女人，個頭電到咁鬈曲，但個男友咁靚仔，當然嗰個係杜德偉，哈哈！（唔驚講多咗激嬲人？）唔驚，觀眾買票入場o架嘛，驚得罪觀眾多啲。」

個名係老闆改

談到「咔啦騷」名字的由來，原來是杜汶澤經理人公司老闆楊受成起的，阿澤笑言：「佢成日叫我做『咔啦騷』，即係茄喱啡咁解，個騷都會講我喺亞視做咔啦騷嘅趣事，當時可能覺得拍劇拍得好辛苦，但過咗去就係得啖笑。」

場地：Faces Music Lounge

文：影視組