蕭正楠遺傳戲種代父從演

無綫小生蕭正楠今年劇接劇，更被視為「最佳男配角」、「飛躍進步男藝員」的頂頭大熱之一。他於《大太監》中飾演的反骨太監「添壽」令人眼前一亮，不過Edwin坦言未想過自己會否得獎，皆因自己師承視帝黎耀祥，他說：「我喺戲內戲外都叫祥仔做師傅，大家去橫店拍《大太監》外景時，佢經常同我分享過去嘅經歷，亦教曉我任何得失都應該用平常心去面對，就算祥仔當初因為柴九呢個角色，拎視帝嘅呼聲好高，但佢從來都無話自己贏硬！而我從來亦唔會諗自己會唔會得獎，咁只會增加拍劇嘅壓力，顧慮太多反而驚難入戲！」

為入戲豁出去

為了入戲，Edwin更為自己設計「瘌痢」頭，他說：「我喺《大太監》入面由忠變奸，仲會折墮到流落街頭生瘌痢，個妝其實係我建議o架，個頭仲係我自己剃！以前拍戲我好貪靚，好驚自己唔夠靚仔，反而畀咗框框自己，但依家我真係豁咗出去！」

今年獲最佳男配角及飛躍提名，他坦言演藝細胞全來自已過身的爸爸：「我嘅演藝細胞其實係遺傳自我爸爸，佢好識搞氣氛，仲參加過歌唱比賽，不過為咗頭家，佢就選擇咗做懲教署職員。」古時有花木蘭代父從軍，現有Edwin代父從演：「依家我可以做到演員，都算係完成咗我爸爸想做演員嘅夢想。」

髮型：Patrick @ HH

場地：名華軒

文、攝：李佩珊