陳靜強攻事業 Hold住愛

o靚模出身的陳靜（DaDa）只主演過三套電影，便憑港產片《低俗喜劇》提名台灣金馬獎最佳女配角，雖然最後未能勝出，但已夠威水，她直言演技有待改進，故早已打定輸數，並在頒獎禮上感受到一眾電影人的熱誠，令她更想為影壇出力：「最開心係香港電影得咁多獎，其實我知道輸咗之後都有一剎那唔開心，但好快就覺得係種激勵，我應承咗公司要繼續努力，一定要再返嚟攞獎！」此行DaDa順便在台北暢遊，問到有否艷遇？她即表示要向追求者落閘：「我依家事業心更加強，所以短期內都唔拍拖住！」

雖然錯失真金馬，但有台灣fans十分有心，向DaDa送上迷你金馬獎座，她說：「件禮物好貴重，個fans仲話睇咗《低》片五次，令我好感動！仲有好多朋友知我冇獎，紛紛短訊安慰，好多謝佢哋。」

粉絲送陳靜迷你金馬獎，令她十分窩心。

為了在演藝業有一番作為，陳靜打算將愛情擱置一旁。

不刻意封胸

DaDa在《低》片、《喜愛夜蒲》及《潮性辦公室》都有露肉演出、角色踩界，現在會否升呢封胸？她表示想向專業演員路進發，不會框死自己，若劇本需要一樣會剝，但承認會嚴選劇本：「唔想畀人覺得我只係性感，想試其他角色，就算做乞兒都得，只要有發揮，露唔露唔係重點！」提到比同期出道的Angelababy及周秀娜更早有電影提名，問到會否覺得較優勝？DaDa說：「唔會咁諗，大家行緊嘅路唔同！佢哋有好多優勝之處，我依家先係起步！（進軍內地？）我都嚮往返內地工作，但拍完《低》片更熱愛香港文化。」

文：立影　

場地：Zummer