Cammi孖師妹貓步橫行
o靚模謝芷蕙（Cammi）日前率領兩名師妹到銅鑼灣血拼，一行三人以三胞胎造型出現，一式一樣的髮型，同樣穿短褲騷長腿，更一字排開霸晒成條街打橫行，恍如三個「女版Nel Nel」大搖大擺當街行Catwalk，相當招搖。
經常被嘲貌似形象指導張學潤（Nelson）、被網友狠封「女版Nel Nel」的Cammi，難得ＥＱ甚高，自信亦不弱，經常用神乎其技的化妝技巧，飛走豬膽鼻和蒙豬眼來變靚。日前Cammi以師姐身份率領兩師妹到銅鑼灣出巡，三人竟然以一模一樣的打扮出現，一齊留齊陰長髮，配上短打騷長腿，三個「女版Nel Nel」同時出現，認真重口味。
自豪影合照
三女恍如三胞胎姊妹般由百貨公司步出，每人手持一大袋戰利品，再結伴去買珍珠奶茶。期間三個女仔忽然一字排開打橫行，霸晒成條街齊齊踏步，大搖大擺姿態如同行Catwalk，非常壯觀地行去兩間戲院揀戲睇。
Cammi等人的招搖行徑迅即吸引途人注意，期間有女中學生認出Cammi，主動上前要求合照，氹得Cammi笑逐顏開，一臉自豪地與女學生逐個慢慢影，成功在師妹面前凸顯其師姐身份及知名度。
捐錢顯善心
與學生影完相後，未幾有慈善團體前來募捐，Cammi大方地掏出銀包攞錢，既顯善心之餘亦展露大師姐風範。三女行了幾轉仍然揀唔啱電影入場，最後齊齊去唱K打發時間。
文、攝：追蹤組