周家蔚搵奶粉錢 危踩高靴
周家蔚與岑麗香昨午出席主題樂園聖誕節活動，腹大便便的家蔚穿上有踭長靴，仍健步如飛，讓旁人看得牙煙！懷有8個月身孕的她，近期頻頻出活動，家蔚揚言有適合活動都會繼續做，為搵奶粉錢可謂搏到盡！
周家蔚昨穿上紅色白點短裙配有踭長靴，打扮醒神，雖然肚子「籮咁大」但仍步履輕盈，家蔚透露每個月做產前檢查都會好緊張，因每個月只可見腹中BB一次；近期頻頻出席活動的她，坦言仍會看情況來接活動工作，為搵奶粉錢密密做！談到即將到來的聖誕，她表示老公洪天明不在港，相信佳節自己會形單影隻，惟有寄望BB出世後，明年可以舉家慶祝佳節。
岑麗香返加探母
同場的岑麗香則因為獲得意外假期而心情興奮，她已訂好機票稍後將返加拿大與家人短聚數天，且表示：「到時會接媽媽上下班，趁車程大家傾吓偈，不過唔可以喪食，因為返嚟要開劇。」家蔚隨即表示十分羨慕香香：「其實我06年選完港姐後，試過抽3日時間返加拿大，返去唔夠24小時又要走，都係想探吓啲朋友，依家諗番都覺得值得嘅，思鄉嘛。」
文：影視組