黎耀祥尖旺拉票有勢頭

角逐視帝的祥仔近日不斷被安排現身拉票，明顯無綫為他造勢，祥仔笑言：「咁啱啫！林峯、鄭嘉穎都喺大陸忙緊嘛！（着數啲？）哈哈……希望啦！」他身繫24號綵帶形同議員拉票般好有勢，但他則唱反調：「老實講，咁樣作用不大，觀眾鍾意睇劇選角色！（公投視帝投自己一票？）有投自己，老實唔客氣啦！」最近免費電視發牌多多意見，問祥仔支持發牌否？他亦不忘為《大太監》賣廣告：「有良好競爭都係好！（贊成？）冇話贊唔贊成，不過政策應該要明確，唔好好似『李連英』咁拖拉。」

而陳茵媺今年第一次入圍最佳女主角候選，她坦言有提名已很開心：「我心水係佘詩曼或米雪攞！但就最想《天梯》攞「最佳劇集」獎！（陳豪有冇投畀你？）未呀，希望佢投，（咁你有冇投佢攞視帝？）Of course！」陳豪昨晚被問到可有投女友票時，他自言會徇私：「視后、女配我都投咗佢！」