黎耀祥爭視帝五五波

曾奪兩屆視帝兼連續第三年於台慶劇擔正的黎耀祥（祥仔），今年有機會再次問鼎視帝寶座，不過祥仔貫徹其謙虛內斂的性格表示：「信心一半一半啦！《大太監》以戲論戲係幾好，角色亦幾特別，但因為始終已經攞過視帝，再攞嘅機會基本上細啲，因為已經畀人認同過，觀眾嘅要求會高咗，所以都係五五波啦！」

近年不少花旦小生都愛北上拍劇搵人仔，不過身為廿四孝爸爸的祥仔，卻為了正值青春期的乖仔放棄賺錢機會，他坦言：「我真係無乜興趣返大陸拍劇，囝囝依家15歲，係最需要我陪在身邊嘅時間，咁我着重屋企多，我覺得就算工作幾成功，家庭失敗都唔會開心！」

幾日唔返屋企

今年祥仔有份擔正的三套無綫劇集無獨有偶均是古裝劇，但祥仔竟自爆最愛拍時裝劇：「其實我鍾意拍時裝，因為拍古裝好辛苦，次次至少着三件長袖，但啲衫好厚又唔通風，真係好焗好辛苦！記得拍《造王者》時開完廠景就開外景，連沖涼嘅時間都無，高峰期仲試過幾日無返屋企，要喺車瞓，連妝都唔落！」

因為深明拍劇的辛酸，對於囝囝將來會否加入娛樂圈，祥仔斷言：「唔會啦！佢唔鍾意。（同佢傾過？）係呀，我唔覺得佢會鍾意做演員。

髮型：IVAN LEE @ HEADQUARTERS

造型：K @ geniuskingdom.com

文：李佩珊

攝：吳文聰