關淑怡終身學習
樂壇天后關淑怡入行25年，試過紅透半天，亦嘗過事業、愛情觸礁收場。時光荏苒，她剖白在娛圈生涯中絕無錯過任何人與事，更要效法爸爸「終身學習」的處世宗旨，唱出豐盛人生來！
關淑怡（Shirley）闊別紅館五年，將於明年2月舉行一連兩場的《Your Favourite Shirley Kwan Suk "E" In Concert 2013》。對音樂素有要求的她更欽點陳奕迅的金曲《陀飛輪》重新演繹，為個唱造Sing勢，更重要的是唱活箇中的大智慧，她謂：「對首歌有感覺先揀，呢個習慣冇改過。」
《陀》教人學懂珍惜時間，匆匆25個年頭裏，Shirley曾紅極一時，亦經歷過兩度淡出，在變幻的娛樂圈裏，Shirley坦言從不覺得錯失任何人事：「唔覺得自己錯過任何嘢，亦唔覺自己懷才不遇，因為一個豐盛人生必須要試好多嘢。」
搞音樂劇
數到至親，Shirley直言視父親為學習對象，取其「做到老學到老」的做人態度：「幾老都要繼續學，人生就係咁，好似爹哋一把年紀，對學問仲咁有心，自己都好相信呢樣嘢！」因此，她決意在個唱上嘗試接觸不同音樂，她說：「唔係只係傳統得一隊樂隊，想試吓Big Band Sound！」原來Shirley最大的音樂理想是舉辦大型音樂劇，有別於流行音樂，她立志搞一個藝術味重的音樂劇：「幾有意思同意義，對我嚟講係挑戰，但唔會喺兩年內，因為正式籌備一個音樂劇要成三年！」
文：音樂組
攝：沈健程
髮型：Calvin Chan@M.i Salon
化妝：Navi Lam
手錶：Philip Stein
場地：如心艾朗酒店