李璨琛首表態 發誓冇吸毒
藝人李璨琛（Sam）及潮人杜如風都是徐濠縈老死，對阿徐跟黃浩爆出連串是非，而Sam嫂梁志瑩（Pae）也牽涉其內，護妻情切的Sam昨日嘲黃浩多次報警，暗寸非正常人所為，又豎起三隻手指發誓沒做過吸毒的事，而杜如風也澄清有關藝人集體吸毒短片與她無關。
自黃浩爆出有藝人集體在其餐廳「吸毒」，聲稱被閉路電視拍下片段及被已離職員工以短片向其勒索，之後即爆出黃浩跟徐濠縈的是非戰，Sam嫂Pae也被牽涉入內。昨晚Sam出席活動時終開腔回應，他力撐太太說：「我企佢嗰邊，正常人都唔會報幾次警，又拖埋記者，勞師動眾。」
真金不怕洪爐火
Sam覺得有需要表態，之前因葉佩雯結婚才未有回應，他承認是黃浩餐廳飯局藝人之一，指為友人慶祝生日，當晚共有廿三人在場，Sam更舉起三隻手指說：「我發誓我冇做過個老闆講嘅指控，如果佢有片，啲雜誌唔使畫公仔，我行得正企得正，真金不怕洪爐火，要還我一個清白，希望快啲水落石出！」
Sam指事件愈講愈複雜，成件事疑點重重，他說：「個飯局係上年1月15日，當晚唔知點解去嗰度，第一次去，唔明點解嗰時唔報警，咁耐之後先報，又話前員工勒索佢，又唔交到片，呢啲係犯法事，如果真嘅話，要有人協助調查。（你有冇被警方邀協助調查？）冇，如果唔係，我就唔可以今日講呢件事啦。」
對於阿徐的女兒康堤也成為傳媒追訪對象？Sam說：「連小朋友都唔放過，禍不及妻兒，去學校搵小朋友回應好傷。（傳阿徐同Eason鬧不快出走？）識咗咁耐梗係冇問題。」當問到阿徐與組合LMF成員阿傑攬咀緋聞，Sam則激動說：「有冇搞錯！低能，愈講愈離譜，無中生有，要咀一早就咀咗啦，都唔會喺呢啲場合。」
阿徐Eason冇嘢
另方面，杜如風昨日在電台出現，對黃浩報稱有藝人集體「開飯」一事，她說：「我都畀人傳係其中一個，但當時我喺北京拍嘢，就知件事可信性幾高。」對黃浩報警聲稱遭到恐嚇，她說：「冇人恐嚇過佢，佢有片喺手點解唔澄清，佢報警我好開心，如果有片警方會搵片中人，但警方冇搵過我，我都想警方介入查清楚。」她透露阿徐在日本曾跟她聯絡，她力證Eason與阿徐關係冇變：「呢啲傳言係假嘅。（佢哋心情點？）當然有一定影響，因為都冇做過。」
文：音樂組