周麗淇dry慣：鍾意自己嚟
久未拍拖的周麗淇昨日出席護膚品活動時，透露聖誕及除夕等大節日也要在工作中度過，自認眾所周知久旱無甘露，並說已開始習慣這份感覺，認真無奈！
周麗淇（Niki）昨日出席活動時，透露正忙於拍攝電視劇《好心作怪》，希望趕及聖誕前完工，並慶幸不用拖到下年。然則除夕倒數與誰共度？她笑言：「同所有歌迷一齊過，聖誕除夕我都要開工。（好dry？）都dry咗好耐，大家都知。我已經開始習慣，唔知係好事定壞事。（家人有冇催？）冇得催。（家姐周汶錡話唔肯做你媒人？）我鍾意自己嚟，好硬頸。加上我剛剛轉咗新公司，出年好多job，感情隨緣。」
落水抓住黃宗澤
日前Niki拍一場落水戲，本來公司安排了替身，但為求效果更好，最終她親身上陣：「浸咗四、五個鐘，浸到手指脹晒。好在唔算好凍，但我唔識游水，所以搏命抓住一齊拍落水戲嘅黃宗澤。」
提到台慶頒獎禮，有份提名視后及最喜愛角色的Niki，認為提名只是畀面，未想過獲獎：「每個頒獎禮都有自己嘅遊戲規則，雖然話一人一票，我有歌迷支持，但點都唔夠林峯多。」其視后心水是米雪，又讚楊怡與徐子珊表現不俗：「如果可以我希望同楊怡、子珊合作拍劇，好過畀個獎我。」
羅霖靜候第二春
同場還有羅霖、模特兒鍾浠文、名媛李桂蘭、董晶怡、黃美儀等，羅霖自稱向來勤力護膚，為覓第二春而努力保養？她否認說：「我冇諗過，呢啲係緣分，順其自然。（男友要過小朋友嗰關？）好難答，對我嚟講太遙遠，當然一定要錫小朋友，要三個仔接受。（有冇追求者？）我依家分居，未離婚。我以前拍拖，完咗一段感情都要等半年至一年平復番先會識男友。一段感情要花好多時間。（嚇怕？）唔係，要歇一歇先，總之將來唔會一個人。」對於吳綺莉突遭電台辭退，曾任其節目嘉賓的羅霖力撐吳綺莉，指她做得稱職：「炒一個人應該要一個月前通知，等人有心理準備同時間去搵工。（電台做法過分？）有啲。」
文：名人組