RB處男騷 神秘女踩場
樂隊RubberBand（RB）昨日為本月九日在紅館舉行的《RubberBand Easy Concert演唱會2012》綵排，演唱會邀得有「港版Psy」之稱的著名節目監製錢國偉擔任執行監製，新婚的歌手杜德偉（Alex）更自動「搵上門」作特別嘉賓，不過為免會場變成全男班和尚寺，他們大賣關子已請得一名女性神秘嘉賓。
出道四年的本地樂隊RubberBand將於紅館開處男騷，近日四子加以備戰，昨日便到土瓜灣一大廈綵排，演唱會監製、港版「騎馬舞大叔」錢國偉亦有到場。
成員泥鯭表示綵排進展順利，現時正努力牢記演唱會的rundown，但另一成員阿偉笑言泥鯭的記性差，而泥鯭亦直認說：「我啲記憶力好似七、八十歲老人家咁咋！」阿偉反笑他說：「泥鯭個腦淨係得啲日劇。」
早前RubberBand直言演唱會不會有驚喜，但問到會邀請甚麼嘉賓？四子卻有料爆，泥鯭先笑說：「肥Wil（Wilson錢國偉）囉！」會唔會一齊跳騎馬舞？6號說：「跳舞留番畀Wilson同現場觀眾啦！」在旁邊鬼馬的錢國偉則開玩笑：「如果6號肯跳舞，我唱歌又點話丫？」
杜德偉請纓做嘉賓
再追問有沒有其他嘉賓，四子終於認真起來，泥鯭說：「好喇，我認真答喇，我哋請到Alex（杜德偉），因為我哋之前翻唱過佢嘅《擦身情緣》，Alex聽過覺得幾好，就自動搵上門做我哋今次嘅嘉賓喇。」不過阿偉卻謙虛笑說：「不過我哋唱嘅版本係衰啲嘅。」而6號就說：「今次演唱會會唱個好聽啲嘅版本o架喇。」不過為免台上出現清一色男人咁齋嘅場面，四子透露已邀得一名女性神秘嘉賓，但又吊住觀眾癮，未肯爆出嘉賓名字。