吳綺莉夾爆手指標血見骨
吳綺莉連日發功炮轟商台，大喊被人利用，昨日她出席活動時更禍不單行，被車門夾爆手指見骨，受了多重打擊的她更顯得有點語無倫次！反觀商台就一於少理，更立刻找來人氣急升的黎芷珊接棒做主持，接Job不斷的芷珊亦淡定表示已簽半年合約！
吳綺莉日前自爆被商台單方面終止合約，被嫌Out爆的她連日來不斷發聲炮轟商台，更暗示有人「篤背脊」，矛頭直指其節目拍檔梁泰來。昨日梁泰來開咪做節目時，劈頭第一句就說：「今日喺我身邊嘅係靚女主持楊崢！」而整個節目中兩名主持隻字未有提及吳綺莉，擺明將她踢出局！
成了棄將的吳綺莉前日就殘爆到海洋公園出席慈善活動，同場還有林建明（大姐明）和萬綺雯等人，當眾人離開公園預備用膳時，大姐明登車後便大大力關上車門，豈料一直緊隨其後的吳綺莉的左手正按在車門上，其中指皮肉立刻被車門夾爆！懵然不知的大姐明還要等吳綺莉開口說其手被夾住了，才驚覺要打開車門，此時她的中指已血流不止，眾人大為緊張紛紛遞上紙巾。未知吳綺莉是否痛傻了，竟說：「冇事冇事，不過見到骨喎，原來骨係白色o架喎！」今鋪可真是衰開有條路！
另外，成功上位的黎芷珊繼擊退查小欣後，將接替吳綺莉做節目主持一職，昨日芷珊接受電台訪問時，當聞言吳被炒一事反應甚大：「唔關我事o架！我唔知原來係頂替佢喎，上星期係梁泰來Contact我，但冇講過呢樣嘢，不過未決定幾時開咪。」
黎芷珊簽半年約
她又指已簽了半年合約，未有人提及過試用期，亦未洽談細節。問到她會否怕被人比較，她說：「聽你哋咁講真係有啲壓力，你哋講到我好驚啊！其實今次佢哋講明唔使我做咁多訪問，唔想搭咗無綫嗰邊。（怕唔怕同吳綺莉有誤會？）唔驚，識咗佢好耐，訪問過佢好多次啦。」