楊怡被催嫁謙仔頭都暈
楊怡於馬來西亞頒獎禮成為大贏家，昨日回港時她心情勁靚，與緋聞男友羅仲謙大方合照。對於被徇眾要求結婚，楊怡雖然大耍太極兼話聽到頭暈，但她都甜笑回應，表現甚Sweet。
【冼嘉敏、陳家儀吉隆坡直擊】楊怡前晚於馬來西亞《我的最愛頒獎典禮ASTRO ON DEMAND AWARDS 2012》首次封后，更奪得多個獎項成為大贏家。她於台上領獎時激動落淚，更請了相識十多年的林峯一起上台分享喜悅，但遭林峯催她與緋聞男友羅仲謙早日結婚。
送「男友」拉票
昨日眾星回港出席祝捷會，楊怡大方與謙仔合照兼碰杯。提到得獎感受時，楊怡再次眼濕濕。問為何於台上領獎時沒有多謝謙仔？她謂：「因為冇乜要多謝，諗唔到多謝佢啲乜。」對於謙仔受訪時稱：「得到人生最重要嘅嘢！」問覺不覺是指她時，楊怡笑謂：「我唔知喎！我唔係嘢，係人囉！你問番佢啦！可能佢拍呢套劇時遇到好深刻嘅時期。（佢台上多謝你，冧唔冧？）佢叫咗好多名喎！（現場被催婚喎！）聽到頭暈呀！依家啲人作風係咁，一有緋聞就會興起哄。（留番香港攞埋視后先結？）唔會，隨緣啦！唔會專登有呢啲計劃，有獎賺錢先。」提到有藝人「送禮」給Fans拉票，她笑言：「送羅仲謙畀大家啦！（攞佢啲裸照出嚟？）冇！我哋冇裸照。」
奪得「男配角」獎的謙仔坦言信心大增，並指上台時多謝了很多人，但不知觀眾為何會起哄嗌楊怡。他說：「自己係男仔都要大方啲，《On Call 36小時》楊怡幫咗我好多。（啲人起哄叫你哋結婚。）講笑啫。（楊怡上台冇多謝你。）我真係冇乜幫過佢，佢攞視后係實至名歸。」問為何領獎時沒有發表愛的宣言？他謂：「唔知講乜。（攞視帝先求婚？）黐線！冇呢樣嘢，婚姻隨緣。好女仔個個男人都想，但唔知自己有冇呢個福氣。」謙仔自爆拍《On》劇時經歷人生最低潮，問是否傅穎事件時，他稱：「唔好提。」
難得唔避忌
向二人催婚的林峯事後坦言：「我唔係玩，我認真o架！佢哋好Sweet。奇怪佢哋過往都好避忌，唔知點解今次咁好。」提到有傳無綫為捧他做《勁歌》「最受歡迎男歌手」而取消亞太區男、女歌手獎，林峯愕然地表示不知情：「無綫每次有變動都好似為我咁，知唔知我視帝都未攞過o架！（怕唔怕遭非議？）係咪都有人話，攞又話，唔攞又話，咁梗係攞！」